قازاقستاندا مىڭداعان بالا جاقىن ارادا ءبىلىم دەپوزيتتەرىنە مەملەكەتتىك قولداۋ الادى. infohub.kz سايتىنىڭ حابارلاۋىنشا، ەلىمىزدە 15 مىڭ بالا جاقىن كۇندەرى AQYL ءبىلىم دەپوزيتتەرىنە 3،9 ملرد تەڭگە الادى. بۇل تۋرالى وتباسى بانكىندە مالىمدەدى.
«كەلەشەك» باعدارلاماسى اياسىندا مەملەكەت بەس جاستان باستاپ بالالارعا AQYL دەپوزيتتەرىنە باستاپقى ءبىلىم كاپيتالىن ەسەپتەيدى. باعدارلاما ىسكە قوسىلعاننان بەرى وتباسى بانكى ارقىلى مۇنداي مەملەكەتتىك قولداۋدى 35 مىڭ بالا الدى. جالپى اۋدارىلعان سوما 8،2 ملرد تەڭگەنى قۇرادى.
بانكتە اتاپ وتكەندەي، جاقىن كۇندەرى 2026 جىلدىڭ ءبىرىنشى جارتىجىلدىعىندا بەس جاسقا تولعان تاعى 15 مىڭ بالا دەپوزيتتەرىنە 3،9 ملرد تەڭگە الادى. ەكىنشى جارتىجىلدىقتا بەس جاسقا تولاتىندارعا تولەمدەر 2027 جىلدىڭ اقپان ايىندا جاسالادى. جالپى 2026 جىلدىڭ قورىتىندىسى بويىنشا 7،5 ملرد تەڭگە كولەمىندەگى ءبىلىم كاپيتالىن 30 مىڭعا جۋىق بالا الادى.
«كەلەشەك» باعدارلاماسى اياسىندا تامىز ايىندا مەملەكەت بالانىڭ شوتىنا 260 مىڭ تەڭگە ەسەپتەيدى. بۇل قاراجاتتى الۋ جانە ساقتاۋ ءۇشىن اتا-انالار AQYL دەپوزيتىن اشىپ، بالا كامەلەتكە تولعانعا دەيىن ۇنەمى جارنا سالىپ تۇرۋى كەرەك. جىلدىق ەڭ تومەنگى جارنا 24 اەك، ياعني 2026 جىلى 103،8 مىڭ تەڭگەنى قۇرايدى. الەۋمەتتىك وسال ساناتتاعى بالالار ءۇشىن – 12 اەك، ياعني 51،9 مىڭ تەڭگە.
سونىمەن قاتار دەپوزيتكە وتباسى بانكىنەن – جەسن 14،75%-دان، ال مەملەكەتتەن – 5% سىياقى ەسەپتەلەدى.
18 جاستا ءبىلىم دەپوزيتىندەگى جيناققا بالانىڭ «ۇلتتىق قور – بالالارعا» باعدارلاماسى بويىنشا العان قاراجاتىن قوسىپ، ۋنيۆەرسيتەتكە تۇسۋگە پايدالانۋعا بولادى. ول ۋاقىتتا شوتتا بىرنەشە ميلليون تەڭگە جينالۋى مۇمكىن.
بۇعان دەيىن Alatau City Bank (بۇرىنعى Jusan Bank) Aqyl ءبىلىم جيناق دەپوزيتى بويىنشا مولشەرلەمەلەردى بىردەن 1،5 پ.ت. كوتەرگەنى حابارلانعان بولاتىن.