استانادا بولاشاق ويىندارى-2026 اياسىندا PUBG: Battlegrounds تارتىبىندە چەمپيون انىقتالدى. جەڭىستى 131 ۇپاي جيناعان قىتايلىق 17 Gaming كومانداسى جەڭىپ الدى، دەپ حابارلايدى infohub.kz سايتى.
قازاقستان استاناسىندا ءوتىپ جاتقان GOTF 2026 تۋرنيرىندە وسى ءتارتىپ بويىنشا الەمنىڭ 16 ۇزدىك كومانداسى 15 ماچ وتكىزدى. تارتىستى باسەكە قورىتىندىسى بويىنشا 2018 جىلى قۇرىلعان 17 Gaming كومانداسى ءبىرىنشى ورىنعا يە بولدى. ەكىنشى ورىندى ۆەتنامدىق GAM The Expendables (120 ۇپاي) يەلەنسە، ۇشتىكتى 2013 جىلدان بەرى كيبەرارەنالاردا ونەر كورسەتىپ كەلە جاتقان فرانسۋزدىق Team Vitality (106 ۇپاي) تۇيىندەدى.
تۋرنيردەگى كۇرەس وتە شيەلەنىستى بولدى: چەمپيون تەك سوڭعى كارتادا انىقتالدى، ال كوشباسشىلار ءۇش ويىن كۇنى بويى اۋىسىپ وتىردى. جەڭىمپاز 300 مىڭ دوللار جۇلدە قورىن يەلەنسە، كۇمىس جۇلدەگەر 120 مىڭ، قولا جۇلدەگەر 100 مىڭ دوللار الدى. مۇنداي دەڭگەيدەگى تۋرنيرلەردە تۇڭعىش رەت ونەر كورسەتكەن قازاقستاندىق DIGA Esports كومانداسى 59 ۇپاي جيناپ، 14-ورىنعا تۇراقتاپ، 15 مىڭ دوللار ۇتىپ الدى.
DIGA Esports كومانداسىنىڭ اتلەتى سانجار قالييەۆ اسەرىمەن ءبولىستى: «بىزدەن بولەك، تۋرنيرگە الەمنىڭ 15 ۇزدىك كومانداسى قاتىستى، سوندىقتان ويناۋ وتە قيىن بولدى. ءبىراق ءبىز جاقسى ناتيجە كورسەتتىك دەپ ويلايمىن، ءارى مۇنداي تۋرنيرگە قاتىسۋ ءبىز ءۇشىن ۇلكەن مارتەبە بولدى. جانكۇيەرلەردىڭ قولداۋىن ەستىپ، كورىپ تۇردىق، بۇل شىنىمەن جۇرەگىمىزگە جىلۋلىق ۇيالاتتى. ءبىرىنشى كۇن ءبىز ءۇشىن بەيىمدەلۋ كەزەڭى بولدى، ەكىنشى كۇنى ويناۋ وڭايىراق بولدى، ال ءۇشىنشى كۇن جاقسى ءوتتى دەپ سانايمىن. ءبىزدىڭ كوماندادا بۇرىن ءىرى ەۋروپالىق جارىستارعا دا قاتىسپاعان ويىنشىلار بار، ال مۇندا بىزگە قارسى الەم چەمپيوندارى وينادى. سوندىقتان مۇنداي دەڭگەيدەگى كوماندالار اراسىندا 14-ورىن — ونشا جامان ناتيجە ەمەس».
قازاقستاندىق كوماندا ءۇشىن جارقىن ساتتەردىڭ ءبىرى — ءتۋرنيردىڭ سەگىزىنشى ماچىنداعى جەڭىس بولدى، ونى استانالىق Beeline Arena تريبۋناسىنداعى كورەرمەندەر قوشەمەتپەن قارسى الدى. ەسكە سالايىق، بولاشاق ويىندارى 2026 استانادا 29 شىلدەدە باستالىپ، 9 تامىزدا اياقتالادى. باعدارلاما سەگىز ءتارتىپتى قامتيدى، جالپى جۇلدە قورى 4،65 ميلليون دوللاردى قۇرايدى. ۇيىمداستىرۋشى — «قازسپورتينۆەست» اق، قازاقستان رەسپۋبليكاسى تۋريزم جانە سپورت مينيسترلىگى مەن استانا اكىمدىگىنىڭ قولداۋىمەن. Alatau City Bank ۇسىنعان Battle Royale – PUBG: BATTLEGROUNDS جارىستارى اياقتالعاننان كەيىن تۋرنير قالعان تارتىپتەر بويىنشا جالعاسۋدا.
Phygital Basketball فينالدىق ماچتارى دۇيسەنبى، 3 تامىزدا وتەدى، ال Bank CenterCredit ۇسىنعان MOBA PC Dota 2 جارىستارى 5 تامىزعا دەيىن سوزىلادى. 4 تامىزدان باستاپ Phygital Football UFL، Phygital Shooter CS 2 جانە MOBA Mobile MLBB تۋرنيرلەرى باستالادى. Phygital Dancing جارىستارى 6-7 تامىزدا، ال Phygital Fighting 8 تامىزدا وتەدى.