اقش-تاعى اۋقىمدى ورمان ورتتەرى سپورت جارىستارىن ۇيىمداستىرۋشىلاردى كەستەنى قايتا قاراۋعا ماجبۇرلەپ وتىر. ءقاۋىپتى اۋا ساپاسىنا بايلانىستى ماچتار كەيىنگە شەگەرىلىپ، جەكەلەگەن ءىس-شارالار توقتاتىلدى، بۇل 2026 جىلعى فۋتبولدان الەم چەمپيوناتى فينالى قارساڭىندا الاڭداۋشىلىقتى كۇشەيتىپ وتىر، دەپ حابارلايدى infohub.kz سايتى.
ماسەلەن، MLB اياسىنداعى «نيۋ-يورك مەتس» پەن «فيلادەلفيا فيلليس» اراسىنداعى ماچ ءبىر ساعاتقا ەرتە وتكىزىلسە، MLS-تىڭ «ۆانكۋۆەر ۋايتكەپس» جانە «چيكاگو فاير» اراسىنداعى كەزدەسۋى چيكاگودا جوسپارلانعان كونسەرتپەن بىرگە قازان ايىنا دەيىن شەگەرىلدى.
قويۋ ءتۇتىن ۇلى كولدەر مەن اقش-تىڭ شىعىس جاعالاۋىنداعى اۋدانداردى جاۋىپ، كورىنۋدى ناشارلاتىپ، اۋانىڭ لاستانۋ دەڭگەيىن ءقاۋىپتى شاماعا كوتەردى. ءبىرقاتار قالالاردىڭ بيلىگى تۇرعىندارعا ۇيدە قالۋعا نەمەسە قورعانىس ماسكالارىن پايدالانۋعا كەڭەس بەردى، ال ۇلتتىق مەتەورولوگيالىق قىزمەت جاعدايدى ءتۇتىندى جەر بەتىنە جاقىن ۇستاپ تۇرعان تۇراقتى جوعارى قىسىمدى ايماقپەن ءتۇسىندىردى.
فۋتبولشىلار مەن بەيسبولشىلار دا اۋىر جاعدايعا شاعىمداندى. «فيلادەلفيا فيلليس» كومانداسىنىڭ ءبىرىنشى ءبازيسى برايس حارپەر مۇنداي اۋا ساپاسىندا ويناۋ ءقاۋىپتى ەكەنىن مويىندادى، الايدا ماچ وتكىزىلدى. وسىعان ۇقساس جاعداي فيلادەلفيادا 2023 جىلى دا ورىن العان ەدى، سوندا كاناداداعى ورمان ورتتەرىنىڭ تۇتىنىنەن MLB كەزدەسۋىن كەيىنگە شەگەرۋگە تۋرا كەلدى.
ايەلدەر فۋتبولىندا دا پروبلەمالار تۋىندادى. اقش قۇراماسىنىڭ ويىنشىسى ترينيتي رودمان NWSL ماچىنان كەيىن اۋا ساپاسىنىڭ ناشارلىعى سونشا، ونىڭ ويىنشا، ويىندى بولدىرماۋ كەرەك ەكەنىن ايتتى. سپورتشىنىڭ سوزىنە قاراعاندا، سۋ ىشۋگە ءجيى ءۇزىلىس جاساۋ ويىنشىلار ءۇشىن جاعدايدىڭ قانشالىقتى اۋىر بولعانىن كورسەتتى.
2026 جىلعى فۋتبولدان الەم چەمپيوناتى فينالىنا بىرنەشە كۇن قالعاندا ۇيىمداستىرۋشىلار دا وسى ماسەلەگە – كاناداداعى اۋقىمدى ورمان ورتتەرىنىڭ تۇتىنىنەن اۋا ساپاسىنىڭ ناشارلاۋىنا تاپ بولدى.
بريتاندىق سپورت ءجۋرناليسى روب ءحارريستىڭ مالىمەتىنشە، 17 شىلدەدە اق ءۇي وكىلدەرى فيفا پرەزيدەنتى دجانني ينفانتينومەن كەزدەسىپ، نيۋ-يورك پەن نيۋ-دجەرسي ماڭىنداعى تۇتىندەۋگە بايلانىستى ويىنشىلاردىڭ، جانكۇيەرلەر مەن پەرسونالدىڭ دەنساۋلىعىنا تونەتىن ىقتيمال قاۋىپتەردى تالقىلايدى. بۇل ايماقتا سوڭعى كۇندەرى اۋا ساپاسى يندەكسى «دەنساۋلىققا زيان» مەن «وتە زيان» ارالىعىندا بولعان ەدى. الەۋمەتتىك جەلىلەردە فينال وتەتىن «مەتلايف» ستاديونى قويۋ تۇمانعا ورانىپ تۇرعان كادرلار تارادى.
ستاديوننىڭ توبەسى بولماعاندىقتان، قاتتى ءتۇتىن جاعدايىندا ماچ وتكىزۋ فۋتبولشىلار مەن كورەرمەندەردىڭ قاۋىپسىزدىگىنە قاتىستى الاڭداۋشىلىق تۋدىرۋدا. جاعدايعا قوسىمشا نازار فينالعا اقش پرەزيدەنتى دونالد ترامپتىڭ قاتىسادى دەپ كۇتىلۋىنە بايلانىستى.
سونىمەن قاتار، فيفا-داعى دەرەككوزدەردىڭ مالىمەتىنشە، فينالدى كەيىنگە شەگەرۋ نەمەسە ونى وتكىزۋ ورنىن اۋىستىرۋ ماسەلەسى ءقازىر قاراستىرىلماي وتىر. ۇيىمداستىرۋشىلار سەنبىگە بولجانعان جاۋىن-شاشىن اۋا ساپاسىن جاقسارتىپ، لاستاۋشى بولشەكتەردىڭ ەداۋىر بولىگىن جۋىپ كەتەدى دەپ ۇمىتتەنەدى. سينوپتيكتەردىڭ بولجامىنشا، جەكسەنبىگە قاراي اۋا رايى ايتارلىقتاي جاقسارۋى مۇمكىن.
تۇتىندەۋ كوماندالاردىڭ دايىندىعىنا اسەر ەتتى. يسپانيا قۇراماسى نيۋ-يورك ماڭىندا سموگ جاعدايىندا اشىق جاتتىعۋ وتكىزسە، ليونەل مەسسي باستاعان ارگەنتينا قۇراماسى اتلانتادا دايىندالدى، وندا اۋا ساپاسى ايتارلىقتاي جاقسى بولدى.
يسپانيا مەن ارگەنتينا قۇرامالارى اراسىنداعى فينالدىق ماچ 19 شىلدەدە «مەتلايف» ستاديونىندا وتەدى. ويىنعا 80 مىڭنان استام كورەرمەن كەلەدى دەپ كۇتىلۋدە.