قازاقستاندا ءتورت اي ىشىندە 27 تارتىپتىك جازا العان سوتتالعانعا قاتىستى قىلمىستىق ءىس توقتاتىلدى، دەپ حابارلايدى infohub.kz سايتى.
قىلمىستىق ىستەر جونىندەگى كاسساسيالىق سوتتىڭ مالىمەتىنشە، ءبىرىنشى ساتىداعى سوت پەن اپەللياسيالىق ساتى قازاقستاندىقتى ق ر قىلمىستىق كودەكسىنىڭ 428-بابىنىڭ 1-بولىگى بويىنشا – باس بوستاندىعىنان ايىرۋ ورىندارىندا جازاسىن وتەپ جۇرگەن ادامنىڭ قىلمىستىق-اتقارۋ (پەنيتەنسيارلىق) جۇيەسى مەكەمەلەرى اكىمشىلىگىنىڭ زاڭدى تالاپتارىنا قاساقانا باعىنباۋى ءۇشىن كىنالى دەپ تانىدى. الايدا كاسساسيالىق سوت ۇكىمدى قايتا قاراپ، قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى قىلمىستىق ءىستى توقتاتتى.
سوتتار انىقتاعانداي، پ.-نى قىلمىستىق جاۋاپكەرشىلىككە تارتۋعا نەگىز بولعان – مەكەمە اكىمشىلىگى ءتورت اي ىشىندە سالعان 27 تارتىپتىك جازا. ونىڭ 26-سى سوتتالعاننىڭ تارتىپتىك وقشاۋلاعىشتا جانە جالعىز كامەرادا ۇستاۋ كەزىندە جىبەرىلگەن بۇزۋشىلىقتارعا بايلانىستى بولعان.
كاسساسيالىق سوت ازاماتتىڭ ورىنداماعانى ءۇشىن جاۋاپكەرشىلىككە تارتىلعان مەكەمە اكىمشىلىگىنىڭ تالاپتارى زاڭدى بولماعان دەگەن قورىتىندىعا كەلدى. بۇل تەرگەۋ سوتتارىنىڭ قاۋلىلارىمەن، ۋاكىلەتتى ورگانداردىڭ تەكسەرۋ ناتيجەلەرىمەن جانە ءىستىڭ وزگە دە ماتەريالدارىمەن راستالعان.
سونىمەن قاتار، جازالار سوتتالعان ادام سالەمدەمەنىڭ ءبىر بولىگىن زاڭسىز الىپ قويۋعا شاعىمدانا باستاعاننان كەيىن قولدانىلا باستاعانى، ال وعان دەيىن ونىڭ مىنەز-قۇلقىنىڭ ەكىنشى وڭ دارەجەسى مەن كوتەرمەلەۋلەرى بولعانى انىقتالدى.
بۇل جاعدايدا اكىمشىلىك تالاپتارى زاڭدى بولماعاندىقتان، ال سوتتالعاننىڭ ارەكەتتەرى ءوز قۇقىقتارىن قورعاۋعا باعىتتالعاندىقتان جانە مەكەمەنىڭ قالىپتى جۇمىسىن بۇزباعاندىقتان، قىلمىستىق قۇقىق بۇزۋشىلىق قۇرامى جوق. وسىعان بايلانىستى سوت اكتىلەرى جويىلىپ، قىلمىستىق ءىس توقتاتىلدى.