قازاقستاندا جالعان ديپلومدارعا قارسى بەلسەندى كۇرەس جۇرگىزىلۋدە: بۇگىنگى تاڭدا 46 جالعان قۇجات پەن ولاردى زاڭسىز دايىنداۋمەن اينالىسقان 20 ينتەرنەت-رەسۋرس انىقتالدى، دەپ حابارلايدى infohub.kz سايتى.
عىلىم جانە جوعارى ءبىلىم مينيسترلىگىنىڭ مالىمەتىنشە، سوڭعى ۋاقىتتا جەلىدە جالعان ديپلومدار تۋرالى اقپارات ءجيى كەزدەسەدى. قۇجاتتاردىڭ ءتۇپنۇسقالىعىن تەكسەرۋ ءۇشىن ۆەدومستۆو 1991 جىلدان بەرى بەرىلگەن ديپلومداردىڭ دەرەكقورىن قۇردى.
مينيسترلىكتە تۇسىندىرگەندەي، ديپلومدار ارنايى مودۋل ارقىلى بىرەگەي نومىرلەر مەن QR-كودتار بەرىلە وتىرىپ جاسالادى. جۇيەگە تەك وسى مودۋلدە تىركەلگەن جوعارى وقۋ ورىندارىنىڭ رەسمي جاۋاپتى قىزمەتكەرلەرى عانا قول جەتكىزە الادى. ديپلومدار «ءبىرىڭعاي جوعارى ءبىلىم بەرۋ پلاتفورماسى» (ەپۆو) اقپاراتتىق جۇيەسىندەگى ءبىلىم الۋشىلار تۋرالى دەرەكتەر نەگىزىندە جاسالادى. ەگەر ءبىلىم الۋشى تۋرالى مالىمەت ەپۆو-دا بولماسا، ديپلوم ءنومىرىن قالىپتاستىرۋ مۇمكىن ەمەس.
ءوز ۇلگىسىندەگى، ءبىراق جاسالعان بىرەگەي ءنومىرى مەن QR-كودى جوق ءبىلىم قۇجاتتارى جارامسىز دەپ سانالاتىنى اتاپ ءوتىلدى. «سونىمەن قاتار، جوعارى وقۋ ورىندارى دەرەكتەردى سيفرلاندىرۋدى جالعاستىرۋدا، ال جۇمىس بەرۋشىلەر ديپلومنىڭ ءتۇپنۇسقالىعىن ارنايى سەرۆيس ارقىلى تەكسەرە الادى: https://epvo.kz. ديپلومنىڭ ەلەكتروندىق نۇسقاسى ەلەكتروندىق ۇكىمەت قوسىمشاسىندا دا قولجەتىمدى („سيفرلىق قۇجاتتار“)»، — دەپ قوستى مينيسترلىك.
سونىمەن قاتار، قازاقستاندا جالعان ءبىلىم قۇجاتتارىن جاساۋ جانە ساتۋ فاكتىلەرىنە تۇراقتى مونيتورينگ جۇرگىزىلىپ، جولى كەسىلۋدە. انىقتالعان جاعدايلار بويىنشا ماتەريالدار ءىىم مەن مادەنيەت جانە اقپارات مينيسترلىگىنە جىبەرىلدى.
ق ر قىلمىستىق كودەكسىنىڭ 385-بابىنا سايكەس، جالعان قۇجاتتاردى جاساۋ نەمەسە پايدالانۋ ايىپپۇل سالۋعا، تۇزەۋ جۇمىستارىنا نەمەسە 2 جىلعا دەيىن باس بوستاندىعىن شەكتەۋگە نە باس بوستاندىعىنان ايىرۋعا اكەپ سوعادى.