قازاقستاندىق تاەكۆونديستەر ساميرحون اباباكيروۆ پەن بەيبارىس قابلان ازيا ويىندارى-2026-داعى ونەرلەرىن شيرەك فينالدا اياقتادى. توگجان قازنابەك پەن نازىم ماحمۋتوۆا بولسا 1/8 فينالدا جەڭىلىپ، جارىستان شىعىپ قالدى، دەپ حابارلايدى infohub.kz سايتى.
68 كەلىگە دەيىنگى سالماق دارەجەسىندە بەلدەسكەن اباباكيروۆ ءتۋرنيردى ۆەتنامدىق لە تۋاندى 2:0 ەسەبىمەن جەڭۋمەن باستادى. الايدا شيرەك فينالدا قازاقستاندىق سپورتشى كورەيالىق مۋن دجينحوعا جول بەرىپ، جۇلدە مۇمكىندىگىنەن ايىرىلدى.
80 كەلىدەن جوعارى سالماقتا قابلان 1/8 فينالدا اۋعاندىق الي اكبار اميريدەن باسىم ءتۇستى — 2:0. شيرەك فينالدا قازاقستاندىق يوردانيا سپورتشىسى موحامماد ال-اداربيمەن كەزدەسىپ، ءۇش راۋندتا 1:2 ەسەبىمەن جەڭىلدى دە، جارتىلاي فينالعا ءبىر قادام جەتپەي توقتادى.
ايەلدەر اراسىنداعى 57 كەلىگە دەيىنگى سالماقتا قازنابەك ءبىرىنشى جەكپە-جەگىندە يراندىق ناحيد كيانيچاندەحكە 0:2 ەسەبىمەن جول بەردى. 67 كەلىدەن جوعارى سالماقتا ونەر كورسەتكەن ماحمۋتوۆا 1/8 فينالدا ۆەتنامدىق باك تحي كحيەممەن كەزدەسىپ، 0:2 ەسەبىمەن جەڭىلدى.
وسىلايشا، 3 قازاندا دايانگقا شىققان ءتورت قازاقستاندىق تاەكۆونديستىڭ بارلىعى دا جۇلدەسىز اياقتادى.
ءبىر كۇن بۇرىن تاميرلان تىلەۋلەس ازيادا-2026-نىڭ 58 كەلىگە دەيىنگى سالماق دارەجەسىندە چەمپيون اتاندى. باتىرحان تولەۋعالي 80 كەلىگە دەيىنگى سالماقتا قولا جۇلدەگە قول جەتكىزدى. ريتا باكيشەۆا ۆيرتۋالدى تاەكۆوندودان ويىنداردىڭ قولا جۇلدەگەرى اتاندى.
جاپونياداعى XX جازعى ازيا ويىندارى 19 قىركۇيەكتە رەسمي تۇردە اشىلدى. 45 ەلدىڭ سپورتشىلارى قاتىساتىن جارىستا 460 كومپلەكت مەدال ساراپقا سالىنۋدا. ازيادا-2026-دا قازاقستان قۇراماسىنىڭ ساپىندا 35 سپورت تۇرىنەن 558 سپورتشى ونەر كورسەتۋدە.