اباي وبلىسىندا جۇڭگو كاپيتالىنىڭ قاتىسۋىمەن ەكى ءىرى ونەركاسىپ نىسانى بوي كوتەرەدى: وبلىس اكىمى Inner Mongolia Wanjiang Investment جانە Xinjiang Sanbao Industrial Group كومپانيالارىمەن ەلەكتروليتتىك اليۋميني زاۋىتى مەن جوڭقالى پليتا (دسپ) وندىرەتىن زاۋىت سالۋ تۋرالى كەلىسىمگە قول قويدى. ەكى جوباعا سالىناتىن ينۆەستيسيانىڭ جالپى كولەمى 1،5 ملرد دوللارعا باعالانىپ وتىر، دەپ حابارلايدى infohub.kz سايتى.
قۇجاتتار «قازاقستان – جۇڭگو» ينۆەستيسيالىق فورۋمى اياسىندا قول قويىلدى. ەكى جوبانىڭ ىشىندەگى ەڭ اۋقىملىسى – جىلىنا 300 مىڭ توننا ەلەكتروليتتىك اليۋميني شىعاراتىن زاۋىت قۇرىلىسى. كاسىپورىندى ەنەرگيامەن قامتاماسىز ەتۋ ءۇشىن قۋاتى 1 گۆت جەل ەلەكتر ستانسياسىن سالۋ كوزدەلگەن.
1،5 ملرد دوللارلىق جالپى ينۆەستيسيانىڭ 1 ملرد دوللارى اليۋميني زاۋىتىنا جۇمسالادى. جوبا ەلەكتروليز سەحىن، انودتاردى جيناۋ جانە ۇساقتاۋ سەحتارىن، سونداي-اق قوسالقى ينفراقۇرىلىمدى سالۋدى قامتيدى. كاسىپورىندا 630 كا ەلەكتروليزەرلەر مەن ەلەكتروليتتىڭ ەنەرگيا ۇنەمدەيتىن تەحنولوگياسى قولدانىلادى.
زاۋىت قۇرىلىسىن 2027 جىلدىڭ ناۋرىزىندا باستاۋ، 2028 جىلدىڭ جەلتوقسانىندا اياقتاۋ جوسپارلانىپ وتىر. جوبا مەتالدى ودان ءارى وڭدەۋگە نەگىز قالايدى، سونداي-اق جاڭا جۇمىس ورىندارىن، سالىق تۇسىمدەرىن جانە ساباقتاس سالالاردىڭ قىزمەتتەرى مەن ونىمدەرىنە سۇرانىستى قامتاماسىز ەتەدى.
ەكىنشى جوبا – جىلىنا 2 ملن پاراق جوڭقالى پليتا (دسپ) وندىرەتىن زاۋىت. بۇل وندىرىسكە سالىناتىن ينۆەستيسيا كولەمى 172 ملن دوللارعا باعالانىپ، قارجىلاندىرۋ ينۆەستورلاردىڭ ءوز قاراجاتى ەسەبىنەن جۇزەگە اسىرىلادى.
كاسىپورىن جىلىنا 300 مىڭ تەكشە مەترگە دەيىن اعاشتى وڭدەيدى. بۇل – ورتەنگەن جانە ساپاسىز اعاشتى، جەل قۇلاتقان اعاشتاردى جانە ورمان ورتىنەن زارداپ شەككەن اۋماقتارداعى باسقا دا اعاش قالدىقتارىن وڭدەۋ. جوبا ءۇشىن ساۋ اعاشتار كەسىلمەيدى.
زاۋىت ءونىمى قازاقستان نارىعىنا جانە ورتالىق ازيا ەلدەرىنە ەكسپورتقا باعىتتالعان. جوبانى ىسكە اسىرۋ مەرزىمى – 2027–2028 جىلدار. كاسىپورىن ىسكە قوسىلعان سوڭ 120 تۇراقتى جۇمىس ورنى اشىلادى، قۇرىلىس كەزەڭىندە 80 ۋاقىتشا جۇمىس ورنى قۇرىلادى.
Inner Mongolia Wanjiang Investment Group كومىر ءوندىرۋ جانە تاسىمالداۋ، ەنەرگەتيكا، جابدىق ءوندىرۋ جانە قۇرىلىس سالالارىندا جۇمىس ىستەيدى. كومپانيانىڭ جىلدىق ءتۇسىمى 5 ملرد يۋاننان اسادى، توپ قۇرامىنا 30-دان استام ەنشىلەس جانە باقىلاناتىن كومپانيا كىرەدى.
Xinjiang Sanbao Industrial Group ورتالىق ازيادا 30 جىلدان استام جۇمىس ىستەپ، قازاقستاندا تۇراقتى وكىلدىگى بار. توپ كومپانيالارىنىڭ جيىنتىق سىرتقى ساۋدا اينالىمى 12 ملرد دوللاردان اسادى. وڭىردە ول جوبالاۋ، ساتىپ الۋ، قۇرىلىس جانە ترانسشەكارالىق جەتكىزۋدى ۇيىمداستىرۋدى قامتيتىن EPC مودەلى بويىنشا 50-دەن استام ءىرى جوبانى ىسكە اسىردى.
بۇعان دەيىن ERG 2029 جىلعا دەيىن شامامەن 1 ملرد دوللارعا تولىق سيكلدى اليۋميني زاۋىتىن سالاتىنى حابارلانعان بولاتىن.