اباي وبلىسىندا مامانداندىرىلعان اۋدانارالىق ەكونوميكالىق سوت ماسكەۋ وبلىسىنىڭ تورەلىك سوتىنىڭ شەشىمىن تانىپ، ورىنداۋعا جىبەردى. شەشىم بويىنشا جاۋاپكەرشىلىگى شەكتەۋلى سەرىكتەستىكتەن 47 مىڭ ەۋرو، تەڭگەگە شاققاندا 25 ملن تەڭگە ءوندىرىلدى، دەپ حابارلايدى infohub.kz سايتى.
اباي وبلىسى سوتتارىنىڭ رەسمي Telegram-ارناسىندا حابارلانعانداي، مامانداندىرىلعان اۋدانارالىق ەكونوميكالىق سوتتا ماسكەۋ وبلىسىنىڭ تورەلىك سوتى شەشىمىن قازاقستان رەسپۋبليكاسىنىڭ اۋماعىندا تانۋ جانە ورىنداۋعا جىبەرۋ تۋرالى ءوتىنىش قارالدى.
ءىس ماتەريالدارىنا سايكەس، جاۋاپكەرشىلىگى شەكتەۋلى سەرىكتەستىك سوتقا شەتەلدىك تورەلىك سوتتىڭ جاۋاپكەرشىلىگى شەكتەۋلى سەرىكتەستىكتەن 47 مىڭ ەۋرو، سونداي-اق مەملەكەتتىك باج سالىعىن وتەۋ شىعىندارىن ءوندىرۋ تۋرالى شەشىمىن ماجبۇرلەپ ورىنداۋ جونىندە ءوتىنىش بەرگەن.
ماسكەۋ وبلىسىنىڭ تورەلىك سوتىنىڭ شەشىمى زاڭدى كۇشىنە ەنگەن، الايدا بورىشكەر ونى ەرىكتى تۇردە ورىنداماعان.
ءوندىرىپ الۋشىنىڭ وكىلى ءوتىنىشتى قاناعاتتاندىرۋدى سۇراپ، بورىشكەردىڭ تورەلىك سوتتا ءىستى قاراۋ تۋرالى ءتيىستى تۇردە حاباردار ەتىلگەنىن، ال شىعارىلعان شەشىمنىڭ زاڭدى كۇشىنە ەنگەنىن كورسەتتى.
جاۋاپكەرشىلىگى شەكتەۋلى سەرىكتەستىك وكىلى ءوز ۇستانىمىن نەگىزدەۋ ءۇشىن ءىستى قاراۋ ۋاقىتى مەن ورنى تۋرالى ءتيىستى حابارلامانى، سونداي-اق شەشىم كوشىرمەسىندەگى انىق ەمەس بەدەرتاڭبانى جانە شەشىمنىڭ زاڭدى كۇشىنە ەنۋى تۋرالى جەكە انىقتامانىڭ جوقتىعىن كورسەتتى.
سوت شەشىم شىعارۋ بارىسىندا ءوندىرىپ الۋشىنىڭ قاجەتتى قۇجاتتاردى ۇسىنعانىن ەسكەردى: ءتيىستى تۇردە كۋالاندىرىلعان شەشىم كوشىرمەسى، زاڭدى كۇشىنە ەنۋى تۋرالى قۇجات، ەكىنشى تاراپتىڭ پروسەستەن حاباردار ەتىلگەنىن دالەلدەيتىن قۇجاتتار جانە ورىنداۋ قۇجاتى.
ءوتىنىشتى قاراۋ كەزىندە سوت ازاماتتىق پروسەستىك كودەكستىڭ 501–503-باپتارىنىڭ ەرەجەلەرىن باسشىلىققا الدى. بۇل باپتار شەتەلدىك سوتتاردىڭ، شەتەلدىك تورەلىكتەردىڭ شەشىمدەرىن تانۋ، ورىنداۋعا جىبەرۋ جانە ماجبۇرلەپ ورىنداۋدى رەتتەيدى.
قازاقستان رەسپۋبليكاسىنىڭ اۋماعىندا سوت اكتىسى ۇلتتىق ۆاليۋتامەن ورىندالاتىندىقتان، شەتەلدىك تورەلىك ءوندىرىپ العان سومالار ءوتىنىش قارالعان كۇنگى قازاقستان رەسپۋبليكاسى ۇلتتىق بانكىنىڭ باعامى بويىنشا تەڭگەگە قايتا ەسەپتەلدى. وسىلايشا، بەرەشەك سوماسى 25 ملن تەڭگەنى قۇرادى.
سوت تۇسىندىرگەندەي، ءوندىرىپ الۋشى قازاقستان رەسپۋبليكاسىنىڭ سوتىنا جۇگىنگەن كەزدە اتقارۋ پاراعىن جازۋ ءۇشىن تولەگەن مەملەكەتتىك باج شەتەلدىك تورەلىك شەشىمىن تانۋ جانە ورىنداۋ ءراسىمىن باستاۋعا بايلانىستى شىعىس بولىپ تابىلادى جانە شەتەلدىك تورەلىكتىڭ ءوزى ءوندىرىپ بەرگەن سومالاردىڭ قۇرامىنا كىرمەيدى. وسىعان بايلانىستى سوت بۇل سومانى جاۋاپكەردەن وندىرۋدەن باس تارتتى.
مامانداندىرىلعان اۋدانارالىق ەكونوميكالىق سوت قازاقستان رەسپۋبليكاسىنىڭ اۋماعىندا ماسكەۋ وبلىسىنىڭ تورەلىك سوتىنىڭ جاۋاپكەرشىلىگى شەكتەۋلى سەرىكتەستىكتەن 25 ملن تەڭگە، سونداي-اق 890 مىڭ تەڭگە مولشەرىندە مەملەكەتتىك باج سالىعىن وتەۋ شىعىندارىن ءوندىرۋ تۋرالى شەشىمىن تانىپ، ورىنداۋعا جىبەردى.
اباي وبلىسىنىڭ سوتى ءبىرىنشى ساتىداعى سوتتىڭ ۇيعارىمىن وزگەرىسسىز، جەكە شاعىمدى قاناعاتتاندىرۋسىز قالدىردى.
اپەللياسيالىق ساتى 1992 جىلعى 20 ناۋرىزدا تاۋەلسىز مەملەكەتتەر دوستاستىعىنا قاتىسۋشى مەملەكەتتەر ءۇشىن جاسالعان شارۋاشىلىق قىزمەتتى جۇزەگە اسىرۋعا بايلانىستى داۋلاردى شەشۋ ءتارتىبى تۋرالى كەلىسىمگە سايكەس، زاڭدى كۇشىنە ەنگەن قۇزىرەتتى سوتتاردىڭ شەشىمدەرى ءوزارا تانىلىپ، ورىندالاتىنىن ءتۇسىندىردى.
اپەللياسيالىق ساتى شەتەلدىك تورەلىك شەشىمدەردى تانۋ جانە ورىنداۋعا جىبەرۋ تۋرالى وتىنىشتەردى قاراۋ كەزىندە سوت داۋدى ءمانى بويىنشا قارامايتىنىن جانە تالاپتاردىڭ نەگىزدىلىگىن انىقتامايتىنىن اتاپ ءوتتى. سوتتىڭ مىندەتى – ءتيىستى شەشىمدى تانۋ جانە ورىنداۋعا جىبەرۋ ءۇشىن زاڭدا كوزدەلگەن نەگىزدەردىڭ بار-جوعىن تەكسەرۋ.