اباي وبلىسىندا تاڭعى پاترۋلدىك شارا 49 جاستاعى Mazda 626 جۇرگىزۋشىسى ءۇشىن اۋىر سالدارعا اكەلدى: ول جەتى جىلعا جۇرگىزۋشى كۋالىگىنەن ايىرىلىپ، 15 تاۋلىككە قاماۋعا الىندى، دەپ حابارلايدى infohub.kz سايتى.
اباي وبلىسىندا تاڭعى پاترۋلدىك شارا كەزىندە پوليسيا قىزمەتكەرلەرى Mazda 626 كولىگىن بايقاپ، تەكسەرۋ ءۇشىن توقتاتتى. ءىىم ۆەدومستۆولىق سايتىندا حابارلانعانداي، رۋلدە 49 جاستاعى ەر ادام بولعان. قۇجاتتاردى تەكسەرۋ كەزىندە پوليسەيلەر الكوگول ءيىسىن سەزبەگەن، الايدا جۇرگىزۋشىنىڭ سويلەۋى مەن قيمىلدارى تۇسىنىكسىز بولعانىن بايقاعان.
«مەديسينالىق كۋالاندىرۋ قورىتىندىسى بويىنشا، جۇرگىزۋشى ەسىرتكىلىك ماساڭ كۇيدە بولعان»، — دەلىنگەن جاريالانىمدا.
ەر ادامعا قاتىستى اكىمشىلىك ءىس قوزعالدى. ماتەريالدار سوتقا جىبەرىلدى، ال كولىك ايىپپۇل تۇراعىنا قويىلدى.
پوليسيا الكوگولدىك، ەسىرتكىلىك نەمەسە ۋىتتى ماساڭ كۇيدە كولىك جۇرگىزۋ، سونداي-اق مۇنداي ادامعا باسقارۋدى تاپسىرۋ قوعامعا جوعارى ءقاۋىپ توندىرەتىن قۇقىق بۇزۋشىلىقتارعا جاتاتىنىن ەسكە سالدى.
«مۇنداي ارەكەتتەر ءۇشىن 15 تاۋلىككە دەيىن قاماۋعا الۋ جانە 7 جىلعا كولىك قۇرالىن باسقارۋ قۇقىعىنان ايىرۋ تۇرىندەگى قاتاڭ جازا قاراستىرىلعان»، — دەپ حابارلادى پوليسيا.
سونداي-اق قۇقىق قورعاۋ ورگاندارى جۇرگىزۋشىلەردى جول قوزعالىسى ەرەجەلەرىن ساقتاۋعا جانە ماساڭ كۇيدە رۋلگە وتىرماۋعا شاقىردى، مۇنداي ارەكەتتەر جول قوزعالىسىنا قاتىسۋشىلاردىڭ ءومىرى مەن دەنساۋلىعىنا تىكەلەي ءقاۋىپ توندىرەتىنىن اتاپ ءوتتى.