اباي وبلىسىندا پوليسەيلەر اياعى قاتتى جاراقات العان بەس جاسار بالانى اۋرۋحاناعا جەدەل جەتكىزدى. ولاردىڭ ارەكەتىنىڭ ارقاسىندا بالا امان قالدى، دەپ حابارلايدى infohub.kz.
Polisia.kzء-تىڭ مالىمەتىنشە، وقيعا جاڭاسەمەي اۋدانىنىڭ گرانيتنىي اۋىلىندا بولعان. بالا اۋلادا ويناپ ءجۇرىپ، كىرەبەرىس ەسىككە ورمەلەمەك بولعاندا، اينەك سىنىپ، ونىڭ سىنىعى بالانىڭ اياعىن تەرەڭ كەسىپ تاستاعان. قان كۇشتى اعىپ، توقتاماعاندىقتان، بالانىڭ اناسى قورقىپ، سەمەي – وسكەمەن تاس جولىندا پاترۋلدىك كولىكتى توقتاتىپ، ءتارتىپ ساقشىلارىنان كومەك سۇراعان.
پوليسەيلەر ەلامان ماساليموۆ پەن مەدەت سماعۇلوۆ جاعدايدىڭ ماڭىزدىلىعىن باعالاپ، اناسى مەن بالانى دەرەۋ پاترۋلدىك كولىككە وتىرعىزىپ، اۋرۋحاناعا بەت العان. وبلىستىق اۋرۋحانانىڭ قابىلداۋ بولىمىنە دەيىنگى جول نەبارى 12 مينۋتقا سوزىلعان. جەتكەن سوڭ پوليسەيلەر بالانى قولدارىنا الىپ، دارىگەرلەرگە تاپسىرعان، ولار دەرەۋ شۇعىل وتا جاساعان.
بالانىڭ اناسى پوليسەيلەرگە زور العىسىن ءبىلدىردى: «بالامنىڭ اياعىنان قان توقتامادى، مەن قاتتى قورىقتىم. نە ىستەرىمدى بىلمەدىم، جولدا پوليسەيلەردى كورىپ، ولاردان كومەك سۇرادىم. ولار بىردەن كومەكتەسىپ، بالانى كولىككە وتىرعىزدى. نەبارى 12 مينۋتتا ءبىزدى اۋرۋحاناعا جەتكىزدى. سول ساتتە بۇل مەن ءۇشىن زور كومەك بولدى. پوليسەيلەرگە شىن جۇرەكتەن العىس ايتامىن».
پوليسيا مۇنداي جاعدايلاردا ءار مينۋت ماڭىزدى ەكەنىن اتاپ ءوتتى. قۇقىق قورعاۋ ورگاندارى قىزمەتكەرلەرىنىڭ جەدەل ارەكەتىنىڭ ارقاسىندا بالا ۋاقىتىلى قاجەتتى مەديسينالىق كومەك الدى.