اباي وبلىسىندا «ۇشبيىك»، «جارما» جانە «شار» ستانسيالارىنداعى تەمىرجول ۆوكزالدارى كەڭ اۋقىمدى جاڭعىرتۋدان كەيىن قايتا اشىلدى. سالتاناتتى شاراعا وبلىس اكىمى بەرىك ءۋالي قاتىستى، دەپ حابارلايدى infohub.kz.
جۇمىستار پرەزيدەنت قاسىم-جومارت توقاەۆتىڭ تاپسىرماسى مەن «قازاقستان تەمىر جولى» ۇك» اق-نىڭ ۆوكزال ينفراقۇرىلىمىن جاڭعىرتۋ باعدارلاماسى اياسىندا جۇرگىزىلدى. جالپى ەل بويىنشا 124 ۆوكزال جاڭارتىلادى، ونىڭ 10-ى — اباي وبلىسىندا.
«تەمىر جول — ەلدى مەكەندەردى بايلانىستىراتىن ستراتەگيالىق ماڭىزى بار كولىك جۇيەلەرىنىڭ ءبىرى. سوندىقتان ونىڭ ينفراقۇرىلىمىن جاڭارتۋ جانە جولاۋشىلارعا قولايلى جاعداي جاساۋ — ۋاقىت تالابىنان تۋىنداپ وتىرعان ماڭىزدى مىندەت. ماڭىزدى كولىك جولدارىنىڭ توعىسقان جەرىندە ورنالاسقان جارما اۋدانىندا ءبىز بىردەن ءۇش جاڭا ۆوكزالدى اشىپ وتىرمىز. ولار جولاۋشىلارعا قولايلى جاعداي جاساپ، جارما اۋدانىنىڭ ودان ءارى دامۋىنا سەپتىگىن تيگىزسىن»، — دەدى ءۋالي.
ءۇش ستانسيا دا ايماقتىڭ كولىك جۇيەسىندە ماڭىزدى ءرول اتقارادى. ولار ارقىلى «سەمەي — استانا»، «نوۆوسيبيرسك — الماتى»، «پاۆلودار — الماتى»، «سەمەي — قىزىلوردا» جانە «وسكەمەن — الماتى» باعىتتارى بويىنشا جولاۋشىلار پويىزدارى جۇرەدى.
1982 جىلى سالىنعان شار قالاسىنداعى ۆوكزال جاڭعىرتۋدان كەيىن اۋدانىن 413 شارشى مەتردەن 654 شارشى مەترگە دەيىن ۇلعايتتى. ءبىر قاباتتى عيمارات ەكى قاباتتى بولدى، ىشكى بولمەلەر تولىق جاڭارتىلدى، ليفت ورناتىلدى، كۇتۋ جانە قىزمەت كورسەتۋ ايماقتارى زاماناۋي جابدىقتارمەن جاراقتاندىرىلدى. سونداي-اق ۇزىندىعى 716 مەتر جاڭا ارالدىق پلاتفورما سالىندى.
«ۇشبيىك» ستانسياسىنداعى 1995 جىلى سالىنعان ۆوكزالدا سوڭعى كۇردەلى جوندەۋ 14 جىل بۇرىن جۇرگىزىلگەن ەدى. ەندى ونىڭ اۋدانى 83،7 شارشى مەتردەن 201،1 شارشى مەترگە دەيىن ءوستى، ىشكى بولمەلەر جاڭارتىلدى، كۇتۋ جانە جولاۋشىلارعا قىزمەت كورسەتۋ بولمەلەرى قاجەتتىنىڭ بارىمەن جابدىقتالدى.
«جارما» ستانسياسىنداعى 1996 جىلى سالىنعان ۆوكزال عيماراتىن بۇزىپ، قايتا تۇرعىزۋ تۋرالى شەشىم قابىلداندى. جاڭا ۆوكزالدىڭ اۋدانى بۇرىنعى 217 شارشى مەتردىڭ ورنىنا 347،7 شارشى مەتردى قۇرايدى. ىشكى بولمەلەر قايتا جابدىقتالدى، كۇتۋ جانە قىزمەت كورسەتۋ ايماقتارى زاماناۋي تالاپتارعا سايكەستەندىرىلدى. قوسىمشا 650 مەتر پەررون جاڭارتىلدى.