InfoHub Logo

2024 جىلدىڭ قىركۇيەگىندە رۋاندادا ماربۋرگ ۆيرۋسىنىڭ ءورشۋى تىركەلىپ، ونداعان ادام جۇقتىرىپ، 10 ادام قايتىس بولدى، دەپ حابارلايدى دۇنيەجۇزىلىك دەنساۋلىق ساقتاۋ ۇيىمى (ددسۇ). ساراپشىلار بۇل جاعدايدىڭ اۋىرلىعىنا بايلانىستى ۆيرۋستىڭ افريكادان تىس جەرلەرگە تارالۋ مۇمكىندىگىنە الاڭداۋشىلىق بىلدىرۋدە. infohub.kz ءتىلشىسى ۆيرۋس تۋرالى جانە ونىڭ ەرەكشەلىكتەرى جايلى مالىمەت جينادى.

ماربۋرگ ۆيرۋسى – ەبولاعا ۇقساس گەمورراگيالىق قىزبانى تۋدىراتىن ۆيرۋس. ول العاش رەت 1967 جىلى گەرمانيا مەن يۋگوسلاۆيادا تىركەلگەن، سول كەزدە ۋگاندادان اكەلىنگەن مايمىلدارمەن جۇمىس ىستەيتىن عالىمدار اراسىندا ءورشۋ بولعان. ۆيرۋس كوزى – جارقاناتتار، ال ۆيرۋس جۇقتىرۋ ناۋقاستىڭ نەمەسە جانۋارلاردىڭ بيولوگيالىق سۇيىقتىقتارىمەن بايلانىس كەزىندە ورىن الۋى مۇمكىن.

نەگىزگى بەلگىلەرىنە دەنە قىزۋىنىڭ كوتەرىلۋى، قاتتى باس اۋرۋى، قان كەتۋلەر جانە ىشكى اعزالاردىڭ قىزمەتىنىڭ بۇزىلۋى كىرەدى. ءولىم-جىتىم دەڭگەيى ىندەتتىڭ تۇرىنە جانە مەديسينالىق كومەك ساپاسىنا بايلانىستى 24-88 پايىزدى قۇرايدى. قازىرگى ۋاقىتتا ماربۋرگ ۆيرۋسىنا قارسى ارنايى ەمدەۋ نەمەسە ۆاكسينا جوق.

2020 جىلداردان باستاپ ەكۆاتوريالدىق گۆينەيا مەن تانزانيا سياقتى افريكالىق ەلدەردە ۆيرۋستىڭ جاڭا ءورشۋى تىركەلگەن. 2023 جىلدىڭ اقپانىندا ەكۆاتوريالدىق گۆينەيادا العاش رەت اۋرۋ جاعدايلارى تىركەلىپ، ددسۇ-نىڭ الاڭداۋشىلىعىن تۋدىردى. بۇل ءورشۋ ۆيرۋستىڭ كورشى ەلدەرگە تارالۋىنا سەبەپ بولدى. 2024 جىلى رۋاندادا 10 ادام قايتىس بولعانى تىركەلگەن.

ددسۇ ماربۋرگ ۆيرۋسىنىڭ حالىقتىڭ جوعارى قوزعالعىشتىعى جاعدايىندا جاھاندىق تارالۋ مۇمكىندىگى جوعارى ەكەنىن ەسكەرتەدى. قاۋىپتىلىگى – ۆاكسينانىڭ جانە ناقتى ەمنىڭ بولماۋىندا. ۆيرۋس ودان ءارى تارالسا، الەم COVID-19 نەمەسە ەبولا قىزباسى سياقتى جاڭا ىندەتكە تاپ بولۋى مۇمكىن. ساراپشىلار ىندەتتى باقىلاۋ ءۇشىن بايلانىستاردى باقىلاۋ جانە كارانتين سياقتى قاتاڭ الدىن الۋ شارالارىنىڭ قاجەتتىگىن ايتادى.

ماماندار ۆيرۋس ورشىگەن ايماقتارعا بارۋدان اۋلاق بولۋعا كەڭەس بەرەدى. جەكە گيگيەنا ەرەجەلەرىن، اسىرەسە، جانۋارلارمەن نەمەسە جۇقتىرۋى مۇمكىن ادامدارمەن بايلانىستا بولعاندا، ساقتاۋ ماڭىزدى. ۆاكسينا بولماعانىمەن، قولداۋ تەراپياسى مەن ەرتە دياگنوستيكا ناۋقاستىڭ جازىلۋ مۇمكىندىگىن ارتتىرادى.

ۋرال بولىمشەسىنىڭ يممۋنولوگيا جانە فيزيولوگيا ينستيتۋتىنىڭ عالىمى ميحايل بولكوۆتىڭ پىكىرىنشە، ماربۋرگ قىزباسى تمد ەلدەرىندە پايدا بولۋى كۇتىلمەيدى. بۇل ۆيرۋس تروپيكالىق جارقاناتتار ارقىلى تارايدى، ال تمد اۋماعىندا ونداي جارقاناتتار جوق. ميكروبيولوگ سەرگەي نەتەسوۆ بۇل ينفەكسيانىڭ تمد اۋماعىنا ەنۋى ءۇشىن رۋانداعا بارىپ، ناۋقاسپەن تىعىز بايلانىسقا ءتۇسۋ نەمەسە ۆيرۋستى ينە ارقىلى نەمەسە جىنىستىق جولمەن تاراتۋ قاجەتتىگىن قوسادى.