گرەكيانىڭ افيناعا جاقىن ورنالاسقان سالامينا ارالىندا بىرنەشە مينۋت ارالىعىندا ەكى ءورت شىعىپ، سالدارىنان ەكى ادام قازا تاۋىپ، جۇزدەگەن ادام ەۆاكۋاسيالاندى. بۇل تۋرالى infohub.kz سايتى حابارلايدى.
ءورت سوندىرۋشىلەردىڭ مالىمەتىنشە، جالىندى سوندىرۋگە 200-گە جۋىق ءورت ءسوندىرۋشى جۇمىلدىرىلىپ، ولار سالامينا ارالىنداعى ەكى ءورتتىڭ بىر-بىرىنە قوسىلىپ كەتۋىنە جول بەرمەۋگە تىرىسۋدا. گرەك باسىلىمدارىنىڭ حابارلاۋىنشا، العاشقى ءورت جەرگىلىكتى ۋاقىت بويىنشا 14:40-تا (گرينۆيچ بويىنشا 12:40) تىركەلىپ، قاتتى جەلدىڭ سالدارىنان تەز تاراعان. ارالدا جەكسەنبى كۇنى ءورت ءقاۋپى جوعارى دەڭگەيدە بولعان.
جاعالاۋ كۇزەتىنىڭ وكىلى گرەك تەلەارناسى ERT-كە بەرگەن مالىمەتىندە، وسى ۋاقىتقا دەيىن 90-عا جۋىق ادام تەڭىز ارقىلى ەۆاكۋاسيالانعان. ونىڭ ايتۋىنشا، ايماققا بەس پاترۋلدىك كاتەر جىبەرىلىپ، تاعى بىرنەشە جەكە كەمە كومەككە تارتىلعان. ورتكە قارسى بىرنەشە اۋە كەمەسى مەن 50 ءورت ءسوندىرۋ ماشيناسى جۇمىلدىرىلعان.
سالامينا اكىمىنىڭ ورىنباسارى تودوريس زاننيس ءورت سوندىرۋشىلەردىڭ ارالداعى تاۋداعى جالىندى اۋىزدىقتاپ، ەكى ءورتتىڭ بىرىگىپ كەتۋىنە جول بەرمەۋگە تىرىسىپ جاتقانىن ايتتى. افينانىڭ باتىسىندا ورنالاسقان سالامينادا 37 مىڭعا جۋىق تۇرعىن بار، ولاردىڭ كوبى قارت ادامدار.
ايتا كەتەيىك، بيىك تەمپەراتۋراعا بايلانىستى بۇل دەمالىس كۇندەرى ەۋروپانىڭ تۇكپىر-تۇكپىرىندەگى ءورت سوندىرۋشىلەر بىرنەشە تابيعي ورتپەن كۇرەسىپ جاتىر.