قارجى مونيتورينگى اگەنتتىگىنىڭ مىندەتتى الەۋمەتتىك مەديسينالىق ساقتاندىرۋ سالاسىنداعى قاراجاتتى جىمقىرۋدىڭ جولىن كەسۋ جۇمىستارىنا بايلانىستى الاياقتىق جاعدايلارى جيىلەدى، دەپ حابارلايدى infohub.kz سايتى.
الاياقتار وزدەرىن اگەنتتىك قىزمەتكەرلەرى رەتىندە تانىستىرىپ، انىقتالعان بۇزۋشىلىقتاردى سىلتاۋراتىپ، مەديسينالىق مەكەمە باسشىلارىن قىلمىستىق جاۋاپكەرشىلىككە تارتۋمەن قورقىتادى. ولار اقشا تالاپ ەتىپ، سىياقى ءۇشىن ولاردى جاۋاپكەرشىلىككە تارتپاۋعا ۋادە بەرەدى.
وسىنداي الاياقتىق سحەما تۇركىستان وبلىسىندا اشكەرەلەندى. اگەنتتىك قىزمەتكەرلەرىنىڭ اتىن جامىلعان ەكى ادام مەديسينالىق ۇيىم باسشىسىن الداپ، 15 ملن تەڭگە قاراجاتتى يەمدەنبەك بولعان. 5 ملن تەڭگەنى العان سوڭ، الاياقتار قالعان 10 ملن تەڭگەنى بەرۋدى تالاپ ەتكەن.
اعىمداعى جىلدىڭ 8 تامىزىندا ولار تۇركىستان وبلىسى بويىنشا ەكونوميكالىق تەرگەۋ دەپارتامەنتى قىزمەتكەرلەرىمەن اگەنتتىكتىڭ ىشكى قاۋىپسىزدىك دەپارتامەنتىمەن بىرلەسىپ، قىلمىس ۇستىندە ۇستالدى. سوت ولارعا قاتىستى قاماۋدا ۇستاۋ تۇرىندەگى بۇلتارتپاۋ شاراسىن سانكسيالادى. تەرگەۋ جالعاسۋدا.
قما ەسكەرتەدى: جاۋاپكەرشىلىككە تارتۋ قاۋپىمەن نەمەسە جازادان قۇتىلۋعا ۋادە بەرۋمەن قاتار جۇرەتىن كەز كەلگەن اقشا تالابى زاڭسىز بولىپ تابىلادى. مۇنداي فاكتىلەر تۋرالى دەرەۋ ءقما-نىڭ 1458 نومىرىندەگى Call-ورتالىعىنا حابارلاۋ قاجەت.
ازاماتتاردى قارجى مونيتورينگى ورگاندارىنا شاقىرۋ تەك قانا تەرگەپ-تەكسەرۋ جۇرگىزىلىپ جاتقان سوتقا دەيىنگى ىستەر اياسىندا، زاڭنامادا بەلگىلەنگەن تارتىپپەن رەسىمدەلگەن جانە جىبەرىلگەن رەسمي شاقىرتۋ قاعازدارى نەگىزىندە جۇزەگە اسىرىلادى. ازاماتتاردى ساق بولۋعا، الاياقتاردىڭ ايلا-تاسىلدەرىنە الدانىپ قالماۋعا شاقىرامىز.