تۇركىستان وبلىسىندا مەديسينالىق ۇيىم باسشىسىنان 15 ملن تەڭگە الۋعا ارەكەت جاساعان ەكى الاياق ۇستالدى. ولار وزدەرىن قارجى مونيتورينگى اگەنتتىگىنىڭ (قما) قىزمەتكەرى رەتىندە تانىستىرىپ، قىلمىستىق جاۋاپكەرشىلىككە تارتۋمەن قورقىتقان، دەپ حابارلايدى infohub.kz.
قما-دە مۇنداي جاعدايلار مىندەتتى الەۋمەتتىك مەديسينالىق ساقتاندىرۋ جۇيەسىندەگى قاراجاتتى جىمقىرۋعا قاتىستى تەكسەرۋلەر مەن تەرگەۋلەر اياسىندا جيىلەپ كەتكەنىن اتاپ ءوتتى. وسىنى پايدالانعان الاياقتار مەديسينالىق مەكەمە باسشىلارىنا حابارلاسىپ، زاڭبۇزۋشىلىقتار انىقتالعانىن ايتىپ، اقشا بەرسە، قىلمىستىق جاۋاپكەرشىلىكتەن قۇتقاراتىندارىن ۋادە ەتەدى.
تەرگەۋ دەرەكتەرى بويىنشا، تۇركىستان وبلىسىنداعى ەكى كۇدىكتى ءدال وسى سحەمامەن ارەكەت ەتكەن. «وزدەرىن قما قىزمەتكەرى رەتىندە تانىستىرىپ، ولار مەديسينالىق ۇيىمداردىڭ ءبىرىنىڭ باسشىسىنان 15 ملن تەڭگە تالاپ ەتكەن. 5 ملن تەڭگەنى العان سوڭ، قالعان 10 ملن تەڭگەنى بەرۋدى تالاپ ەتكەن»، — دەلىنگەن قما حابارلاماسىندا.
8 تامىزدا كۇدىكتىلەر تۇركىستان وبلىسى بويىنشا ەكونوميكالىق تەرگەۋ دەپارتامەنتىنىڭ قىزمەتكەرلەرى مەن ءقما-نىڭ ىشكى قاۋىپسىزدىك دەپارتامەنتىنىڭ بىرلەسكەن ءىس-شاراسى كەزىندە قولعا ءتۇستى. سوت ولاردى قاماۋعا الۋعا سانكسيا بەردى. تەرگەۋ جالعاسۋدا.
اگەنتتىكتە قارجى مونيتورينگى ورگاندارىنىڭ قىزمەتكەرلەرى قىلمىستىق قۋدالاۋدى توقتاتۋ نەمەسە جاۋاپكەرشىلىكتەن بوساتۋ ءۇشىن اقشا تالاپ ەتپەيتىنىن ەرەكشە اتاپ ءوتتى. قارجى مونيتورينگى ورگاندارىنا شاقىرۋ سوتقا دەيىنگى تەرگەۋ اياسىندا جۇزەگە اسىرىلۋى مۇمكىن، بۇل ءۇشىن زاڭدا بەلگىلەنگەن تارتىپپەن رەسىمدەلگەن رەسمي شاقىرتۋ جىبەرىلۋى ءتيىس.
ۆەدومستۆو قىزمەتكەرلەرىنىڭ اتىنان بوپسالاۋ ارەكەتتەرى تۋرالى ءقما-نىڭ 1458 ءنومىرلى call-ورتالىعىنا حابارلاۋدى سۇرايدى.