افريكا فۋتبول كونفەدەراسياسى (كاف) ۇلتتىق فەدەراسيالاردى فيفا-نىڭ كوممەرسيالىق قۇرىلىم FIFA Forward Enterprise قۇرۋ جونىندەگى داۋلى جوباسىن زەردەلەۋگە شاقىردى. بۇعان دەيىن بۇل جوبا ەۋروپا مەن ازيا تاراپىنان سىنعا ۇشىراعان بولاتىن. بۇل تۋرالى infohub.kz سايتى حابارلايدى.
بۇعان دەيىن فيفا باسشىسى فەدەراسيالارعا قوسىمشا سۋبسيديالار الۋ ءۇشىن FIFA Forward Enterprise كوممەرسيالىق قۇرىلىمىن قۇرۋدى قولداۋدى ۇسىنعان ەدى. اتالعان باستامانى ەۋروپالىق فۋتبول اسسوسياسيالار وداعى (ۋەفا)، سولتۇستىك جانە ورتالىق امەريكا مەن كاريب باسسەينى ەلدەرىنىڭ فۋتبول كونفەدەراسياسى (كونكاكاف) جانە ازيا فۋتبول كونفەدەراسياسى (افك) ايىپتادى.
"وسى كونسۋلتاسيالىق پروسەسس اياسىندا كاف پرەزيدەنتى پاتريس موتسەپە كەلەسى اپتادا اتقارۋ كوميتەتىنىڭ وتىرىسىن وتكىزىپ، باسقا ماسەلەلەرمەن قاتار FIFA Forward Enterprise باستاماسىن باعالايدى. سونداي-اق كاف ءوزىنىڭ مۇشە-اسسوسياسيالارىن FIFA Forward Enterprise ۇسىنىسىن زەردەلەۋگە جانە كاف پەن فيفا رەگلامەنتى مەن بەلگىلەنگەن راسىمدەرگە سايكەس كونسۋلتاسيالىق ۇدەرىسكە قاتىسۋعا شاقىرادى"، — دەدى ۇيىمدا.
كاف ءوز مۇشە-اسسوسياسيالارىمەن، فيفا-مەن، باسقا فۋتبول كونفەدەراسيالارىمەن جانە مۇددەلى تاراپتارمەن كونسۋلتاسيالار مەن ىنتىماقتاستىقتى جالعاستىرۋعا ۋادە بەردى. بۇل — افريكاداعى جانە بۇكىل الەمدەگى فۋتبولدى دامىتۋ مەن ءوسىرۋ ءۇشىن قارجىلىق جانە باسقا رەسۋرستاردى ۇلعايتۋ ماقساتىندا.
جوسپار بويىنشا، FIFA Forward Enterprise كومەگىمەن 2027 جىلدان باستاپ 211 ۇلتتىق اسسوسياسيانىڭ ءارقايسىسى FIFA Forward جانە FIFA Fast-Forward باعدارلامالارى بويىنشا ءتورت جىلدىق سيكل ىشىندە 40 ميلليون دوللارعا دەيىن الا الادى. ال 12 جىل ىشىندە تولەمدەر كولەمى شامامەن 86 ميلليون دوللاردى قۇراۋى مۇمكىن.
بۇعان دەيىن فيفا جوسپارى ەرلەر، ايەلدەر الەم چەمپيوناتتارى مەن كلۋبتىق الەم چەمپيوناتى سياقتى نەگىزگى اكتيۆتەردى باسقارۋ ءۇشىن كومپانيا قۇرۋ ەكەنى حابارلانعان بولاتىن. جوبا بويىنشا دونالد ترامپ اكىمشىلىگىنە جاقىن ادامدارمەن كەڭەسۋلەر جۇرگىزىلدى. بۇل اقپاراتتى فيفا رەسمي تۇردە راستادى.