قازاقستاندا اسكەرگە شاقىرىلۋشىلاردى اسكەر تۇرلەرى مەن تەگىنە بولۋدە جاساندى ينتەللەكت قولدانىلا باستادى، دەپ حابارلايدى infohub.kz سايتى.
قورعانىس مينيسترلىگىنىڭ مالىمەتىنشە، جاساندى ينتەللەكت رەسپۋبليكانىڭ شاقىرۋ كوميسسيالارىنىڭ جۇمىسىنا ەنگىزىلدى — ول مەرزىمدى اسكەري قىزمەتتى وتەۋ ءۇشىن ەڭ وڭتايلى باعىتتى ۇسىنۋعا كومەكتەسەدى.
«شاقىرىلۋشىنىڭ انتروپومەتريالىق دەرەكتەرى مەن ءبىلىم دەڭگەيىنە سۇيەنە وتىرىپ، جۇيە ءتيىستى اسكەر تۇرلەرى مەن تەگىندە قىزمەت ءوتۋ ءۇشىن ەڭ وڭتايلى باعىت بويىنشا ۇسىنىستار قالىپتاستىرادى»، — دەپ ناقتىلادى قورعانىس ۆەدومستۆوسى.
اتالعان قۇرال بارلىق دەڭگەيدەگى شاقىرۋ كوميسسيالارىنا قولجەتىمدى جانە شاقىرىلۋشىلاردى ءبولۋدىڭ وبەكتيۆتىلىگى مەن تيىمدىلىگىن ارتتىرۋعا مۇمكىندىك بەرەدى.
«سيفرلاندىرۋدىڭ ماڭىزدى ناتيجەلەرىنىڭ ءبىرى — ازاماتتاردى دەنساۋلىق جاعدايىنا بايلانىستى مەرزىمدى اسكەري قىزمەتتەن بوساتۋ ءراسىمىنىڭ ەلەكتروندىق فورماتقا كوشىرىلۋى. اۆتوماتتاندىرۋ قاجەتتى راسىمدەردى ءوتۋ مەرزىمدەرىن قىسقارتىپ، شەشىم قابىلداۋدىڭ جەدەلدىگىن ارتتىردى. سونىمەن قاتار، مەرزىمدى اسكەري قىزمەتكە شاقىرىلعان ازاماتتاردى قىزمەتتىڭ بۇكىل كەزەڭىندە مىندەتتى الەۋمەتتىك مەديسينالىق ساقتاندىرۋ جارنالارىن تولەۋدەن بوساتۋ پروسەسى اۆتوماتتاندىرىلدى»، — دەپ قوستى قورعانىس مينيسترلىگى.
ۆەدومستۆو اۆتوماتتاندىرۋ شاقىرىلۋشىلاردىڭ جيناق پۋنكتتەرىنە جەكە كەلۋ قاجەتتىلىگىن جوققا شىعارمايتىنىن ناقتىلادى. زاڭناماعا سايكەس مەرزىمدى اسكەري قىزمەتكە شاقىرۋ تۋرالى شەشىمدى ونلاين فورماتتا جۇرگىزۋ مۇمكىن ەمەس مەديسينالىق كۋالاندىرۋ ناتيجەلەرىنىڭ نەگىزىندە تەك شاقىرۋ كوميسسياسى قابىلدايدى.