لوندوندا وتكەن World Airline Awards 2026 سالتاناتىندا Air Astana اۋەكومپانياسى ەكى ايماقتىق ماراپاتقا يە بولدى. قازاقستاندىق تاسىمالداۋشى ون بەسىنشى رەت قاتارىنان ورتالىق ازيا مەن تمد-نىڭ ۇزدىك اۋەكومپانياسى دەپ تانىلدى، سونداي-اق وندىنشى رەت ايماقتاعى ۇزدىك ۇشۋ كەزىندەگى قىزمەت كورسەتۋ جۇلدەسىنە لايىق دەپ تابىلدى، دەپ حابارلايدى infohub.kz سايتى.
سالتانات جۇما كۇنى، 18 قىركۇيەكتە، اتاقتى لوندوندىق The Langham قوناقۇيىندە ءوتتى. ماراپاتتاردى جىل سايىن الەمنىڭ تۇكپىر-تۇكپىرىنەن جولاۋشىلار اراسىندا ساۋالناما جۇرگىزىپ، سالانىڭ ۇزدىك كومپانيالارىن انىقتايتىن Skytrax حالىقارالىق رەيتينگتىك اگەنتتىگىنىڭ وكىلدەرى تابىس ەتتى. ايتا كەتەيىك، Air Astana قىزمەت كورسەتۋ ساپاسى مەن سەرۆيسى بويىنشا ايماقتاعى مويىندالعان كوشباسشى بولىپ قالا بەرەدى، مۇنى World Airline Awards جۇلدەسى مەن جولاۋشىلاردىڭ جوعارى باعاسى تاعى دا راستادى.
الايدا بيىل Air Astana توبىنىڭ تاعى ءبىر اۋەكومپانياسى — FlyArystan دا لاۋرەاتتار قاتارىنان تابىلدى. لوۋكوستەر ءتورتىنشى جىل قاتارىنان «ورتالىق ازيا مەن تمد-نىڭ ۇزدىك بيۋدجەتتىك اۋەكومپانياسى» مارتەبەسىنە يە بولدى.
Air Astana توبىنىڭ باس اتقارۋشى ديرەكتورى يبراحيم جانلىەل ايتۋىنشا، Air Astana مەن FlyArystan ءۇشىن وسى بەدەلدى Skytrax ماراپاتتارىن الۋ ۇلكەن قۇرمەت.
«بۇل مويىنداۋ ەرەكشە قۇندى، ويتكەنى ول جولاۋشىلارىمىزدىڭ پىكىرىن ءبىلدىرىپ، ەكى اۋەكومپانيانىڭ دا ءوز سەگمەنتتەرىندەگى مىقتى ۇستانىمىن كورسەتەدى. تۇتىنۋشىلارىمىزعا سەنىم مەن ادالدىقتارى ءۇشىن، ال بۇكىل ۇجىمعا ىسكە بەرىلگەندىگى مەن قاۋىپسىزدىك پەن سەرۆيستىڭ جوعارى ستاندارتتارىنا ۇمتىلىسى ءۇشىن العىس ايتقىم كەلەدى»، — دەدى جانلىەل.
Air Astana باسشىسى توپ ءوزىنىڭ ءوسۋ كەزەڭىنىڭ كەلەسى ساتىسىنا قادام باسىپ وتىرعانىن، سونىڭ ارقاسىندا قىزمەتكەرلەر سانىنا، اۋە پاركىنە جانە كليەنتتىك تاجىريبەگە ينۆەستيسيالاردى جالعاستىرۋ جوسپارلانىپ وتىرعانىن قوستى.
اۋەكومپانيانىڭ جەتىستىگىن Skytrax باس ديرەكتورى ەدۆارد پلەيستەد تە اتاپ ءوتتى. ونىڭ ايتۋىنشا، بەدەلدى جۇلدەنى الۋ Air Astana قىزمەتى مەن ءونىمىنىڭ ەڭ جوعارى ستاندارتتارىن كورسەتەدى.
«جولاۋشىلار ۇسىنىلىپ وتىرعان سەرۆيستى جوعارى باعالايدى، ال 2026 جىلدىڭ قورىتىندىسى Air Astana-نىڭ ۇشۋ بارىسىنداعى ۇزدىك ساپانى قامتاماسىز ەتۋگە جانە جوعارى ستاندارتتاردىڭ تۇراقتىلىعىنا ۇمتىلىسىن كورسەتەدى»، — دەدى پلەيستەد.
سونىمەن قاتار كومپانيا ءوز قىزمەتىن كەڭەيتىپ، ءبىر مەزگىلدە قىزمەت كورسەتۋ ساپاسىنا نازار اۋدارۋدى جالعاستىرىپ وتىر. كەزەكتى ماراپاتتار تاڭدالعان دامۋ باعىتىنىڭ تاعى ءبىر دالەلى بولدى.
ايتا كەتەيىك، World Airline Awards اۋەسيالىق جۇلدەسىن Skytrax 1999 جىلى تاعايىنداعان. كومپانيالاردى باعالاۋ ءۇشىن 100-دەن استام ەلدىڭ جولاۋشىلارى اراسىندا حالىقارالىق ساۋالناما جۇرگىزىلەدى. تۇتىنۋشىلار 350-دەن استام اۋەكومپانيانى ۇشۋ بارىسىنداعى جايلىلىق، تىركەلۋ، وتىرعىزۋ جانە تاعى باسقا كوپتەگەن نيۋانستاردى قوسا العاندا، ءتۇرلى ساناتتار بويىنشا باعالايدى. زەرتتەۋ مەن سالتاناتتى Skytrax قارجىلاندىرادى، ال اۋەكومپانيالارعا قانداي دا ءبىر شىعىندى تولەۋگە تۋرا كەلمەيدى، بۇل جۇلدەنىڭ وبەكتيۆتىلىگىن كورسەتەدى.
ەسكە سالايىق، بۇعان دەيىن Air Astana APEX نۇسقاسى بويىنشا «ورتالىق ازيانىڭ ۇزدىك اۋەكومپانياسى» اتاعىن، Pax International Readership Awards، Onboard Hospitality Awards ماراپاتتارىن دا العان بولاتىن.