قازاقستاندىق ۇلتتىق Aitu مەسسەندجەرى ەل تۇرعىندارىن فايل كوشىرۋ قيىندىعىنان، تۇرعىلىقتى جەرى تۋرالى انىقتاما ىزدەۋدەن جانە شەكسىز كىلت تەرۇدەن قۇتقارماق. AI & Digital Bridge 2026 فورۋمىندا BTS Digital كومپانياسى مەسسەندجەردى قازاقستانداعى ءومىردىڭ «شۆەيساريالىق پىشاعىنا» اينالدىراتىن اۋقىمدى جاڭارتۋدى تانىستىردى، دەپ حابارلايدى infohub.kz سايتى.
ايتا كەتەيىك، بۇگىندە WhatsApp ەل حالقىنىڭ 80%-دان استامىن قامتيتىن الىپ بولىپ وتىر — ونى 13 ميلليوننان استام قازاقستاندىق پايدالانادى. وتاندىق Aitu ازىرگە ءوزىنىڭ تۇراقتى اۋديتورياسىن جاڭا قالىپتاستىرىپ كەلەدى: ايىنا بەلسەندى پايدالانۋشىلار سانى 1 ميلليوننان استى. الايدا ازىرلەۋشىلەر جاپپاي حات الماسۋعا ەمەس، ساپا مەن ناقتى سالالىق پايدالىلىققا باسىمدىق بەرىپ وتىر.
تۇساۋكەسەردىڭ باستى ەرەكشەلىگى — كىرىكتىرىلگەن AI to You جاساندى ينتەللەكتىسى. ەندى انىقتاما الۋ نەمەسە بىردەڭە ءبىلۋ ءۇشىن جي-كومەكشىگە حابارلاما جازۋ جەتكىلىكتى — جۇيە قىزمەتتى ءوزى تاۋىپ، ءبارىن جيناقتاپ، راسىمدەپ بەرەدى. وسىلايشا، جاساندى ينتەللەكتپەن چات حقو-عا بارۋدى الماستىرادى.
سونىمەن قاتار Aitu-دا وتباسىلىق نەمەسە جۇمىس قاۋىمداستىقتارىنا بىرىگۋگە، حابارلامالاردى قازاق جانە ورىس تىلدەرى اراسىندا اۆتوماتتى اۋدارۋعا، اقشانى تىكەلەي ديالوگ ىشىندە اۋدارۋعا جانە تەك ۆەريفيكاسيالانعان مەملەكەتتىك ورگاندار مەن بيزنەستەن ءقاۋىپسىز حابارلامالار الۋعا بولادى.
بۇعان دەيىن ۇكىمەت وتىرىسى بارىسىندا BTS Digital كومپانياسىنىڭ باسشىسى ماقسات نۇرىدەن ۇلى ۇلتتىق Aitu مەسسەندجەرىنە 6،8 ملن پايدالانۋشى تىركەلگەنىن مالىمدەگەن. پلاتفورمانىڭ ايىنا بەلسەندى اۋديتورياسى 1 ملن پايدالانۋشىنى قۇرايدى، ال مەسسەندجەرگە كۇن سايىن 100 مىڭ ادام كىرەدى.