فرانكفۋرتتە ءوتىپ جاتقان كوركەم گيمناستيكادان الەم چەمپيوناتىندا ىرىكتەۋ جارىستارى اياقتالدى. قازاقستاندىق گيمناست اكمارال ەرەكەشەۆا جوعارى ناتيجە كورسەتىپ، ءۇش فينالعا جولداما الدى، دەپ حابارلايدى infohub.kz سايتى.
ەكى كۇن بويى سپورتشىلار فينالدىق كەزەڭگە شىعۋ ءۇشىن ب ا ق سىنادى. ىرىكتەۋدە ءتورت ءتۇردىڭ قورىتىندىسى بويىنشا ەرەكەشەۆا 84،200 ۇپاي جيناپ، سەگىزىنشى ورىنعا تۇراقتادى. بۇل ناتيجە وعان ىرىكتەۋ قورىتىندىسى بويىنشا ۇزدىك 18 گيمناست قاتىساتىن جەكەلەي كوپسايىس فينالىنا شىعۋعا مۇمكىندىك بەردى.
جەكەلەگەن تۇرلەردە فينالعا ءار تۇردەن ۇزدىك سەگىز سپورتشى جولداما الادى. ەرەكەشەۆا شىعىرشىقپەن (29،000 ۇپاي) جانە تاسپامەن (28،350 ۇپاي) جاتتىعۋلاردا ىرىكتەۋدەن ءساتتى ءوتىپ، ەكى جاعدايدا دا ءتورتىنشى ورىنعا يە بولدى. دوپپەن جاتتىعۋدا ول 16-ورىن (26،850)، ال قۇرساۋمەن 42-ورىن (25،700) كورسەتتى.
قازاقستاننىڭ تاعى ءبىر وكىلى ايبوتا ەرتاي قىزى جارىستىڭ فينالدىق بولىگىنە شىعا المادى. جەكەلەي كوپسايىستاعى ىرىكتەۋدە ول 80،650 ۇپايمەن 24-ورىنعا تۇراقتادى. ەرتاي قىزى قۇرساۋمەن جاتتىعۋدا ۇزدىك ناتيجە كورسەتىپ، ونىنشى بولدى (28،300). شىعىرشىقپەن ول 15-ورىندا (27،100)، تاسپامەن 32-ورىندا (25،050)، ال دوپپەن 33-ورىندا (25،250) بولدى.
الەم چەمپيوناتىنىڭ العاشقى فينالى جۇما كۇنى، 14 تامىزدا وتەدى. ەرەكەشەۆا قاتىساتىن جەكەلەي كوپسايىستاعى جۇلدەلەر ساراپقا سالىناتىن جارىس قازاقستان ۋاقىتى بويىنشا ساعات 19:00-دە باستالادى.