اقمولا وبلىسىندا كولىك قۇرالىن قايتا جابدىقتاعانى ءۇشىن ايىپپۇل سالىنعان اۆتوبۋس جۇرگىزۋشىسى پاترۋلدەرگە پارا تالاپ ەتتى دەپ جالعان حابارلاما جاساپ، كەك الماق بولدى. ەر ادام پوليسەيلەر ودان 5 مىڭ تەڭگە العانىن ايتقان، الايدا تەكسەرۋ ايىپتاۋدىڭ جالعان ەكەنىن كورسەتتى... دەپ حابارلايدى infohub.kz.
وقيعا 18 تامىزدا استانا – قاراعاندى – الماتى تاس جولىندا بولعان. پاترۋلدەر Van Hool اۆتوبۋسىن قۇجاتتارىن تەكسەرۋ ءۇشىن توقتاتقان. تەكسەرۋ كەزىندە كولىك سالونى قايتا جابدىقتالعانى انىقتالعان: كونسترۋكسيادا قاراستىرىلعان ورىندىقتاردىڭ ورنىنا ۇيىقتايتىن ورىندار ورناتىلعان.
شىمكەنتتەن استاناعا بەت العان جۇرگىزۋشىگە قاتىستى اكىمشىلىك حاتتاما تولتىرىلعان. ەر ادام پوليسەيلەردىڭ ارەكەتىنە نارازى بولىپ، كەك الماق بولعان.
كوپ ۇزاماي «102» جەلىسىنە پاترۋلدەر ودان 5 مىڭ تەڭگە العانى تۋرالى حابارلاما تۇسكەن. قۇقىق قورعاۋ ورگاندارى تەكسەرۋ باستاپ، كوپ ۇزاماي اۆتوبۋستى تاپقان.
«جۇرگىزۋشى العاشىندا „102“ جەلىسىنە قوڭىراۋ شالعانىن جوققا شىعاردى. ونىڭ ۇستىنە، قوڭىراۋ شالىنعان SIM-كارتانى لاقتىرىپ ۇلگەرگەن. الايدا تەكسەرۋ بارىسىندا پوليسەيلەر ارنايى جەلىگە حابارلاما ءدال سول ارقىلى تۇسكەنىن انىقتادى. كەيىن ەر ادام مۇنى حاتتاما تولتىرىلعاننان كەيىن كەك ءۇشىن جاساعانىن مويىندادى»، — دەدى پوليسيادا.
ەندى جۇرگىزۋشىگە ارنايى قىزمەتتەرگە ادەيى جالعان قوڭىراۋ شالعانى ءۇشىن جاۋاپكەرشىلىك قاراستىرىلعان. وعان قاتىستى اكىمشىلىك حاتتاما تولتىرىلعان.
پوليسيا «102» جەلىسىنىڭ ناقتى وقيعالار مەن قۇقىق بۇزۋشىلىقتار تۋرالى حابارلاۋعا ارنالعانىن ەسكە سالادى. ادەيى جالعان قوڭىراۋ شالعانى ءۇشىن اكىمشىلىك جاۋاپكەرشىلىك قاراستىرىلعان.
بۇعان دەيىن الەۋمەتتىك جەلىلەردە ءبىر ەر ادامنىڭ پارا ارقىلى قازاقستان ازاماتتىعىن العانىن ايتقان ۆيدەو تاراعان بولاتىن. ءىىم تەكسەرۋ جۇرگىزىپ، بۇل — شەتەلدىك ازامات جاساعان جالعان اقپارات ەكەنىن انىقتادى.