اقمولا وبلىسىندا بۋلاندى جانە سەلينوگراد اۋداندارىندا ءبىر مەزگىلدە ەكى ءىرى تابيعي ءورت بولدى، دەپ حابارلايدى infohub.kz سايتى.
تجم مالىمەتىنشە، بۋلاندى اۋدانىندا ورمان توسەنىشى، ال سەلينوگراد اۋدانىندا قۇرعاق وسىمدىكتەر ورتەنگەن. بۋلاندى اۋدانىنداعى 26-رازەزد ستانسياسىنىڭ ماڭىندا ورمان توسەنىشىنىڭ ءورتى الدىن الا 5 گەكتار اۋماقتى قامتىعان. ءورتتى سوندىرۋگە تجد، جەرگىلىكتى اتقارۋشى ورگاندار، ورمان شارۋاشىلىعى باسقارماسى جانە «اۋىل قۇتقارۋشىلارى» بولىمشەلەرىنەن 100 ادام جانە 21 تەحنيكا جۇمىلدىرىلدى.
ورتپەن كۇرەسكە اۆياسيا دا تارتىلدى. تجم «قازاۆياقۇتقارۋ» اق تىكۇشاعى 6 ءتۇيىر سۋ تاستاپ، 18 توننا سۋ توگىلدى، ال «قازاۆياورمانقورعاۋ» تىكۇشاعى 22 ءتۇيىر جاساپ، 13 توننا سۋ توگىلدى. ءورت وقشاۋلاندى، ءقازىر ونى تولىق جويۋ جۇمىستارى جۇرگىزىلۋدە.
ەكىنشى ءورت سەلينوگراد اۋدانىنداعى ىبىراي التىنسارين اۋىلىنىڭ ماڭىندا بولىپ، قۇرعاق ءشوپ ورتەنگەن. بۇل ءورت تولىعىمەن ءسوندىرىلدى. سوندىرۋگە اقمولا وبلىسى تجد جانە استانا قالاسىنىڭ كۇشتەرى مەن قۇرالدارى — 47 ادام جانە 12 تەحنيكا جۇمىلدىرىلدى.
ءورت سالدارىنان ەشكىم زارداپ شەككەن جوق. تجم ازاماتتاردى ءورت قاۋىپسىزدىگى ەرەجەلەرىن قاتاڭ ساقتاۋعا جانە وتپەن ابايسىز قاراۋعا جول بەرمەۋگە شاقىرادى.