كوكشەتاۋدا پوليسەيلەر زەرگەرلىك بۇيىمدار مەن قۇندى زاتتارى بار سومكەنىڭ ۇرلانۋىن انىقتادى. كەلتىرىلگەن شىعىن شامامەن 3،5 ملن تەڭگەنى قۇرادى، دەپ حابارلايدى infohub.kz سايتى.
اقمولا وبلىسى پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، كوكشەتاۋ قالالىق پوليسيا باسقارماسىنىڭ كەزەكشى بولىمىنە 70 جاستاعى جەرگىلىكتى تۇرعىن ارىزدانعان. ايەل ابىلاي حان داڭعىلىنداعى ءۇي اۋلاسىندا دەمالعاننان كەيىن سومكەسىن ورىندىقتا ۇمىتىپ قالعانىن، ءبىراز ۋاقىتتان سوڭ قايتىپ كەلگەندە زاتتارى جوعالىپ كەتكەنىن حابارلاعان. كەلتىرىلگەن شىعىننىڭ جالپى سوماسى 3 ميلليون 470 مىڭ تەڭگەنى قۇرادى.
وسى فاكتى بويىنشا سوتقا دەيىنگى تەرگەۋ باستالدى. جەدەل-ىزدەستىرۋ ءىس-شارالارى بارىسىندا پوليسەيلەر جەدەل باسقارۋ ورتالىعىنىڭ بەينەباقىلاۋ كامەرالارىنىڭ، سونداي-اق قىلمىس جاسالعان اۋدانداعى تۇرعىن ۇيلەرگە، ساۋدا نىساندارىنا جانە وزگە دە ۇيىمدارعا ورناتىلعان كامەرالاردىڭ جازبالارىن الىپ، مۇقيات زەردەلەدى. بەينەجازبالاردى تالداۋ جابىرلەنۋشى سومكەنى ورىندىقتا قالدىرعاننان كەيىنگى وقيعالاردىڭ رەتىن انىقتاۋعا، سونداي-اق زاتتى تاۋىپ العان ايەلدىڭ بەلگىلەرىن ايقىنداۋعا مۇمكىندىك بەردى.
ول قاراۋسىز قالعان زاتتاردى بايقاپ، ءبىراز ۋاقىت يەسىنىڭ كەلۋىن كۇتكەن. كەيىن ايەل سومكەنى الىپ كەتكەن، الايدا ونى پوليسياعا وتكىزبەگەن. ونىڭ ايتۋىنشا، ۇيگە بارا جاتقاندا سومكەدەگى ۇيالى تەلەفوندى، قول ساعاتىن جانە زەرگەرلىك بۇيىمداردى الىپ، سومكەنى تاستاپ كەتكەن.
كەلەسى كۇنى قارجىلىق قيىندىقتارعا تاپ بولعان كۇدىكتى تاپقان التىن ساقينالارىنىڭ ءبىرىن لومباردقا وتكىزىپ، 150 مىڭ تەڭگە العان. تۇسكەن اقشانى ازىق-ت ۇلىك پەن دارى-دارمەك ساتىپ الۋعا جۇمساعان.
قازىرگى ۋاقىتتا قىلمىستىق ءىس بويىنشا قاجەتتى تەرگەۋ ارەكەتتەرى جۇرگىزىلۋدە.