الماتى وبلىسىنىڭ قاراساي اۋدانىندا «اقساي» كارەرىنىڭ اۋماعىندا قوقىس ورتەنىپ، ءورت شىقتى. ءورت لوكاليزاسيالاندى، وتتىڭ كورشىلەس اۋماقتارعا تارالۋ ءقاۋپى جوق، دەپ حابارلايدى infohub.kz سايتى.
وقيعا 3 تامىزدا اقساي شاتقالىندا بولدى. ءورتتى سوندىرۋگە تىك ءارى قول جەتپەيتىن بەتكەي، تەحنيكانىڭ كىرۋىنىڭ قيىندىعى جانە ءتۇتىننىڭ تارالۋىنا ىقپال ەتەتىن قاتتى جەل كەدەرگى كەلتىرۋدە.
«وقيعا ورنىندا جەردى رەكۋلتيۆاسيالاۋ، اۋماقتى توپىراقپەن جابۋ جانە ءورت وشاقتارىن ءسوندىرۋ جۇمىستارى جالعاسۋدا»، — دەپ حابارلادى تجم.
الەۋمەتتىك جەلىلەردە الماتىلىقتار قالادا كۇيىك ءيىسى سەزىلگەنىن ايتىپ، ونى كارەردەگى ورتپەن بايلانىستىردى. تجم حابارلاماسىندا ءتۇتىننىڭ نەمەسە زياندى شىعارىندىلاردىڭ مەگاپوليس باعىتىندا تارالعانى تۋرالى رەسمي دەرەكتەر كەلتىرىلمەگەن.
جاعداي ۆەدومستۆونىڭ باقىلاۋىندا.
بۇعان دەيىن «كۋرسيۆ» استاناداعى بايقوڭىر اۋدانىنداعى قاتتى تۇرمىستىق قالدىقتار پوليگونىنداعى ءورتتى بىرنەشە كۇن بويى سوندىرە الماعانىن جازعان بولاتىن. جۇمىستار تاۋلىك بويى جۇرگىزىلىپ، وعان 120-عا جۋىق ادام مەن 150 بىرلىك تەحنيكا تارتىلىپ، اۋماققا 14،9 مىڭ تونناعا جۋىق ينەرتتى ماتەريال اكەلىندى. كەيىن ءورت تولىعىمەن جويىلدى.