اقتاۋدا 16-ميكرواۋداندى كەشەندى اباتتاندىرۋ جۇمىستارى اقىرى قولعا الىندى. قۇرىلىس سالىنعاننان بەرى 10 جىلعا جۋىق ۋاقىت وتسە دە، تۇرعىندار تروتۋار، جول، ينجەنەرلىك جەلى سياقتى قاراپايىم قولايلىلىقتارسىز ءومىر ءسۇرىپ كەلگەن ەدى، دەپ حابارلايدى infohub.kz.
16-ميكرواۋدان 2010 جىلداردىڭ باسىندا قالانىڭ جاڭا تۇرعىن ايماعى رەتىندە قارقىندى دامي باستادى. بىرنەشە جىلدىڭ ىشىندە مۇندا ونداعان كوپقاباتتى ءۇي سالىندى، ءبىراق تۇرعىن ءۇي قۇرىلىسىنىڭ قارقىنى قاجەتتى ينفراقۇرىلىممەن قاتار جۇرمەدى. جاڭا تۇرعىن كەشەندەر پايدالانۋعا بەرىلگەننەن كەيىن ىرگەلەس اۋماقتار اباتتاندىرىلماي قالدى: تروتۋارلار بولمادى، ىشكى كۆارتالدىق جولدار اسفالتتانبادى. جاڭبىرلى كۇندەرى كوشەلەر لايلى باتپاققا اينالسا، جازدا تۇرعىندار شاڭنان تۇنشىقتى.
جەرگىلىكتى تۇرعىنداردىڭ ايتۋىنشا، اباتتاندىرۋ جۇمىستارىنىڭ اياقتالماۋى كۇندەلىكتى ءومىردى قيىنداتقان. اقتاۋ قالالىق اكىمدىگىنىڭ مالىمەتىنشە، قازىرگى تاڭدا ميكرواۋداندا 4300 مەتر سۋ قۇبىرى، 3067 مەتر كارىز جانە 2570 مەتر جىلۋ جەلىلەرى جاڭارتىلعان. شامامەن 4000 مەتر اسفالتبەتون جابىنى توسەلگەن. ىشكى كۆارتالدىق اۆتوجولدار مەن جاياۋ جۇرگىنشىلەر جولدارىنىڭ قۇرىلىسى جالعاسۋدا. الداعى كۇندەرى ب ۇلىنگەن جول ۋچاسكەلەرىن قالپىنا كەلتىرىپ، جول بەلگىلەرىن ورناتىپ، جول سىزىقتارىن سىزۋ جوسپارلانۋدا.
سونىمەن قاتار، 27-ميكرواۋدانداعى «بايتەرەك» ساۋدا ورتالىعىنان باستاپ 16، 17، 18ا جانە 19-ميكرواۋدانداردىڭ قيىلىسىنا دەيىنگى كارىز كوللەكتورىن تولىق رەكونسترۋكسيالاۋ جالعاسۋدا.
16-ميكرواۋدان تۇرعىندارىنىڭ نەگىزگى جاعدايدىڭ جوقتىعىنا شاعىمدانۋى جىل سايىن جالعاسىپ كەلگەن. 2018 جىلى «جەڭىس» تۇرعىن ءۇي كەشەنىنىڭ تۇرعىندارى جىلۋ ماسەلەسىنە شاعىمدانسا، 2021 جىلى №61 ۇيدە گازدىڭ جوقتىعىنا نارازىلىق بىلدىرگەن. 2023 جىلى قوقىس كونتەينەرلەرىنىڭ تاپشىلىعى، قوقىس ۇيىندىلەرى مەن جولداردىڭ جاعدايى كوتەرىلگەن. 2024 جىلى بيلىك جول جانە ينجەنەرلىك جەلى قۇرىلىسى ءۇشىنشى توقساندا باستالادى دەپ ۋادە بەرگەن. ۋاقىت كورسەتكەندەي، اباتتاندىرۋ جۇمىستارى ەندى عانا جۇرگىزىلۋدە.