11 تامىز كەشىندە اقتاۋ تۇرعىندارى اسكەري سۋ-27 ۇشاعى مەن ۇشقىشسىز ۇشۋ اپپاراتىنىڭ ۇشىپ وتكەنىن كوردى. كۋاگەرلەر بولعان وقيعانى بەينەگە ءتۇسىرىپ الدى، دەپ حابارلايدى infohub.kz سايتى.
ايتا كەتەيىك، سۋ-27 ۇشاعى سول كۇنى كەشكە قالا اسپانىندا بايقالعان. سونىمەن قاتار، اقشۇقىر اۋىلىنىڭ ۇستىنەن ۇشقىشسىز ۇشۋ اپپاراتى كورىنگەن. كۋاگەرلەردىڭ ايتۋىنشا، بپلا اۋەجاي جاعىنان اقتاۋ باعىتىنا ۇشقان.
قازاقستان رەسپۋبليكاسى قورعانىس مينيسترلىگى بۇعان دەيىن ازاماتتارعا 2026 جىلدىڭ تامىز-قىركۇيەك ايلارىندا «باتىل تويتارىس – 2026» ستراتەگيالىق كوماندالىق-شتابتىق وقۋ-جاتتىعۋى وتەتىنىن حابارلاعانىن ءتۇسىندىردى. وقۋ-جاتتىعۋعا دايىندىق اياسىندا ەل اۋماعىندا قارۋ-جاراق، اسكەري تەحنيكا جانە جەكە قۇرامدى اسكەري دايىندىق ءىس-شارالارى وتەتىن اۋداندارعا جىلجىتۋ جۇزەگە اسىرىلۋدا.
اسكەردى تاسىمالداۋ ارالاس تاسىلمەن – تەمىرجول ەشەلوندارىمەن، جالپى پايدالانىمداعى جولدارمەن اۆتوموبيل كولوننالارىمەن، سونداي-اق ارميا اۆياسياسىن پايدالانۋ ارقىلى جۇرگىزىلەدى. وقۋ-جاتتىعۋ كەشەندى سيپاتقا يە جانە قازاقستاننىڭ بۇكىل اۋماعىنداعى وقۋ پوليگوندارىن قامتيدى. مانەۆرلەر كەزىندە اسكەريلەر قۇرلىقتا، اۋە كەڭىستىگىندە، تەڭىزدە جانە كيبەركەڭىستىكتە اسكەردى قولدانۋ جانە ارالىق ءوزارا ءىس-قيمىل ماسەلەلەرىن پىسىقتايدى.
«وتكىزىلىپ جاتقان ءىس-شارالار جوسپارلى سيپاتتا جانە اسكەري قىزمەتشىلەردىڭ جاۋىنگەرلىك دايىندىعىن ارتتىرۋعا، اسكەري باسقارۋ ورگاندارىنىڭ ءوزارا ءىس-قيمىلىن جەتىلدىرۋگە جانە قارۋلى كۇشتەردى قولدانۋدىڭ زاماناۋي تاسىلدەرىن پىسىقتاۋعا باعىتتالعان»، – دەلىنگەن حابارلامادا.
وسىعان بايلانىستى تۇرعىنداردى سابىر ساقتاۋعا، رەسمي اقپاراتقا سۇيەنۋگە جانە تەكسەرىلمەگەن مالىمەتتەردى تاراتپاۋعا شاقىردى. ۆەدومستۆو ادەيى جالعان اقپارات پەن راستالماعان مالىمەتتەردى تاراتقانى ءۇشىن جاۋاپكەرشىلىك بار ەكەنىن دە ەسكە سالدى.