اقتاۋ بيلىگى كاسپي تەڭىزىندە قازاقستان رەسپۋبليكاسى قارۋلى كۇشتەرىنىڭ اسكەري-تەڭىز كۇشتەرى وقۋ-جاتتىعۋى كەزىندە اسكەري قىزمەتشىلەردىڭ قازا تابۋىنا بايلانىستى قالا كۇنىنە ارنالعان بارلىق مەرەكەلىك شارالاردى توقتاتقانىن حابارلادى، دەپ جازادى infohub.kz سايتى.
ءتيىستى مالىمدەمەنى قالا اكىمدىگى Instagram-داعى رەسمي پاراقشاسىندا جاريالادى. توقتاتىلعان شارالار قاتارىندا «امفيتەاتر» الاڭىندا جوسپارلانعان سالتاناتتار بار.
«ماڭعىستاۋ وبلىسىندا اسكەري وقۋ-جاتتىعۋ بارىسىندا بولعان قايعىلى وقيعاعا بايلانىستى اقتاۋداعى "امفيتەاتر" الاڭىندا 2026 جىلدىڭ 25-27 قىركۇيەگىنە جوسپارلانعان مەرەكەلىك شارالار وتكىزىلمەيدى»، — دەلىنگەن اكىمدىك حابارلاماسىندا.
اتاپ ايتقاندا، 25 قىركۇيەككە بەلگىلەنگەن «كاسپي — دوستىق تەڭىزى» حالىقارالىق فەستيۆالىنىڭ سالتاناتتى اشىلۋى وتپەيدى. سونداي-اق 27 قىركۇيەكتە ءوتۋى ءتيىس فەستيۆال-بايقاۋدىڭ جابىلۋ سالتاناتى مەن اقتاۋ قالاسىنىڭ كۇنىنە ارنالعان مەرەكەلىك گالا-كونسەرت تە توقتاتىلدى.
«قالا اكىمدىگى اسكەري وقۋ-جاتتىعۋ كەزىندە قازا تاپقان اسكەري قىزمەتشىلەردىڭ وتباسىلارى مەن جاقىندارىنا شىن جۇرەكتەن كوڭىل ايتادى»، — دەدى قالا اكىمشىلىگىندە.
قايعىلى وقيعا 24 قىركۇيەكتە ماڭعىستاۋ وبلىسىندا بولدى. قازاقستان رەسپۋبليكاسى قارۋلى كۇشتەرىنىڭ اسكەري-تەڭىز كۇشتەرى وقۋ-جاتتىعۋى كەزىندە كاسپي تەڭىزى جاعالاۋىندا وقۋ-جاۋىنگەرلىك تاپسىرمانى ورىنداۋ بارىسىندا اۋا رايىنىڭ كۇرت ناشارلاۋى مەن جەلدىڭ كۇشەيۋىنەن اسكەري قىزمەتشىلەردى تەڭىزگە اعىزىپ اكەتتى.
قورعانىس مينيسترلىگىنىڭ الدىن الا دەرەكتەرى بويىنشا تەڭىزگە 19 اسكەري قىزمەتشى تۇسكەن. قازىرگى تاڭدا ولاردىڭ 9-ىنىڭ قازا تاپقانى راستالدى.
باس پروكۋراتۋرا اقتاۋ گارنيزونىندا اسكەري قىزمەتشىلەردىڭ قازا تابۋى فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن مالىمدەدى.
اقتاۋلىق بلوگەر ازامات سارسەنبايەۆ ماڭعىستاۋ وبلىسىنداعى توتەنشە وقيعا ورنىنان ۆيدەو جاريالادى.
وقيعادان كەيىن ۇكىمەتتىك كوميسسيا قۇرىلىپ، وقيعا ورنىنا پرەمەر-مينيستردىڭ ورىنباسارى قانات بوزىمبايەۆ جىبەرىلدى.
قازاقستان پرەزيدەنتى قاسىم-جومارت توقايەۆ ماڭعىستاۋ وبلىسىندا اسكەري قىزمەتشىلەردىڭ قازا تابۋىنا بايلانىستى كوڭىل ايتىپ، قايعىلى وقيعانى تەرگەۋ جونىندە تاپسىرمالار بەردى.