اقتاۋداعى «راحات-2» تۇرعىن ءۇي كەشەنىنىڭ تۇرعىندارى قاتتى ىستىق كەزىندە ەلەكتر قۋاتىنىڭ ۇنەمى وشۋىنە شاعىمداندى. جارىقتىڭ ۇزىلۋىنە بايلانىستى ۇيلەردە سۋ دا جوعالادى، ال ليفتىلەر جۇمىسىن توقتاتادى، دەپ حابارلايدى infohub.kz سايتى.
تۇرعىنداردىڭ ايتۋىنشا، ىشكى جەلىلەر جوعارى جۇكتەمەگە توتەپ بەرە المايدى، ال ۇزدىكسىز ەلەكترمەن جابدىقتاۋدى قامتاماسىز ەتۋى ءتيىس رەزەرۆتىك كابەل توسەلمەگەن. تۇرعىن ءۇي كەشەنىندە شامامەن 800 پاتەر بار، وندا بالالار مەن قارتتاردى قوسا ەسەپتەگەندە 1،5 مىڭعا جۋىق ادام تۇرادى. ەلەكتر قۋاتى وشكەن كەزدە جوعارعى قاباتتاردىڭ تۇرعىندارى جاياۋ كوتەرىلۋگە ءماجبۇر، ويتكەنى ليفتىلەر جۇمىس ىستەمەيدى.
«جارىق وشسە، بىزدە سۋ بولمايدى. سەبەبى ءقازىر بارلىق كوپقاباتتى ۇيلەردە سۋ سورعىلارمەن بەرىلەدى. ال ەلەكتر قۋاتى جوق بولعاندىقتان سۋ بەرۋ توقتايدى. جوعارعى قاباتتار سۋسىز قالادى. ەڭ باستى ءوتىنىش: ەلەكترمەن جابدىقتاۋ ماسەلەسىن رەتتەڭىز»، – دەدى تۇرعىن ءۇي كەشەنىنىڭ تۇرعىنى اسىل الدابەرگەن قىزى.
قىزمەت كورسەتەتىن كومپانيادا ۇزىلىستەر جازدىڭ باستالۋىمەن باستالعانىن حابارلادى. كەرنەۋدىڭ سەكىرۋىنەن ءتورت سورعى ىستەن شىققان. «جاز باستالعالى ەلەكتر قۋاتى ۇنەمى وشەدى. اۋىز سۋ سورعىلارى جۇمىسىن توقتاتادى. سودان كەيىن ليفتىلەر توقتايدى. جاز باسىنان بەرى وسى وشۋلەر سالدارىنان ءتورت سورعىمىز جانىپ كەتتى. ءبىز ولاردى جوندەپ، قايتا ورناتامىز. ءبىراق وسىلاي جالعاسا بەرسە، بارلىق جابدىق ىستەن شىعادى»، – دەدى قىزمەت كورسەتەتىن كومپانيانىڭ باسشىسى مەرۋەرت كوشەرباەۆا.
تۇرعىنداردىڭ ايتۋىنشا، ءۇيدى ءتورت جىل بۇرىن تاپسىرعان قۇرىلىس سالۋشى ءالى كۇنگە دەيىن ەلەكترمەن جابدىقتايتىن ۇيىمعا قاجەتتى قۇجاتتاردى تاپسىرماعان. وسىعان بايلانىستى جەلىلەر يەسىز دەپ ەسەپتەلەدى. تۇرعىندار قۇزىرلى ورگاندارعا ۇجىمدىق ءوتىنىش جولداعان، الايدا ماسەلە ءالى شەشىلمەگەن.
اقتاۋ اكىمدىگىندە ءوشۋدىڭ نەگىزگى سەبەبى ەلەكتر جەلىسىنە شامادان تىس جۇكتەمە دەپ اتالدى. ۇيلەردى ەڭ جوعارى تۇتىنۋ ساعاتتارىندا ەلەكترمەن قامتاماسىز ەتۋ ءۇشىن رەزەرۆتىك كابەل قاجەت، الايدا ول جوق. «قۇرىلىس ۇيىمى ءوز ۋاقىتىندا ەكى كابەل توسەۋى كەرەك ەدى. ءبىراق قازىرگى ۋاقىتتا مۇندا بىرەۋى عانا بار. ياعني رەزەرۆتىك كابەل جوق. سوندىقتان ءوشۋ جاعدايىندا قالپىنا كەلتىرۋ جۇمىستارى ءبىراز ۋاقىت الادى. كابەل جەلىلەرى ساتىپ الىندى. قالا بويىنشا كەزەكتىلىككە سايكەس ولاردى توسەۋ جۇمىستارى جۇرگىزىلۋدە»، – دەدى اقتاۋ اكىمدىگىنىڭ تكش ءبولىمىنىڭ باس مامانى اسەت باسپايەۆ. اكىمدىك جۇمىستاردىڭ ناقتى اياقتالۋ مەرزىمىن اتامادى. سونىمەن قاتار شەنەۋنىكتەر كابەلدى توسەۋدى ءبىر اپتا ىشىندە باستاۋعا ۋادە بەردى.