ماڭعىستاۋ وبلىسىندا ەكى كۇدىكتى ۇستالىپ، ولاردان ءىرى كولەمدەگى اقشا قاراجاتى مەن 100 گرامنان استام اپيىن تاركىلەندى، دەپ حابارلايدى infohub.kz.
وبلىستىق پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، 5 تامىزدا ماڭعىستاۋ وبلىسى پد ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى وبلىس پروكۋراتۋراسىنىڭ ۇيلەستىرۋىمەن ەكى كۇدىكتىنى ۇستاعان.
ءبىرىنشى كۇدىكتىنىڭ اۆتوكولىگىن قاراپ تەكسەرۋ كەزىندە پوليسەيلەر 600 مىڭ تەڭگە تاۋىپ، تاركىلەگەن. كەيىن ەكىنشى كۇدىكتى ۇستالىپ، ونىڭ كولىگىنەن 480 مىڭ تەڭگە تابىلعان.
اقتاۋداعى جالدامالى پاتەردى ءتىنتۋ كەزىندە جالپى سالماعى 100،8 گرامم اپيىن ەسىرتكى زاتى بار 10 وراما جانە پوليەتيلەن پاكەت تابىلىپ، تاركىلەندى. سونداي-اق ەلەكتروندى تارازى، ەسىرتكى دايىنداۋعا جانە تۇتىنۋعا ارنالعان قۇرالدار مەن 670 مىڭ تەڭگە الىندى.
مەديسينالىق كۋالاندىرۋ ەكى ۇستالعان ادامنىڭ دا ەسىرتكىلىك ماساڭ كۇيدە ەكەنىن انىقتادى. قازاقستان رەسپۋبليكاسى قىلمىستىق كودەكسىنىڭ 297-بابىنىڭ 3-بولىگى بويىنشا قىلمىستىق ءىس قوزعالدى. كۇدىكتىلەر اقتاۋ قالالىق پوليسيا باسقارماسىنىڭ ۋاقىتشا ۇستاۋ يزولياتورىنا قامالدى.
تەرگەۋ جالعاسۋدا.