اقتوبەدە پوليسەيلەر قالا كوشەلەرىندە ءقاۋىپتى مانەۆر جاساعان جۇرگىزۋشىلەردى جاۋاپكەرشىلىككە تارتتى. ولاردىڭ ءبىرى «ونەر ورتالىعى» الدىنداعى الاڭدا دريفت جاساسا، ەكىنشىسى ۇيلەنۋ تويىنىڭ كەرۋەنى كەزىندە كولىكتەن سىرتقا شىعىپ تۇرعان جولاۋشىلاردى تاسىمالداعان، دەپ حابارلايدى infohub.kz سايتى.
ءىىم سايتىنىڭ مالىمەتىنشە، الەۋمەتتىك جەلىلەردى مونيتورينگتەۋ بارىسىندا پوليسيا قىزمەتكەرلەرى اقتوبەدەگى «ونەر ورتالىعى» الدىنداعى الاڭدا BMW كولىگىنىڭ جۇرگىزۋشىسى دريفت جاساپ جاتقان ۆيدەونى انىقتاعان. جۇرگىزۋشى انىقتالىپ، جاۋاپكەرشىلىككە تارتىلدى. BMW كولىگى ارنايى ايىپپۇل تۇراعىنا قويىلدى.
تاعى ءبىر جاعدايدا پوليسيا قىزمەتكەرلەرى ۇيلەنۋ تويىنىڭ قۇرامىندا كەلە جاتقان Chery Tiggo كولىگىن انىقتادى. جۇرگىزۋشى ءقاۋىپتى مانەۆرلەر جاساعان، ال جولاۋشىلار كولىكتەن سىرتقا شىعىپ، جول قوزعالىسى قاۋىپسىزدىگىنە قاتەر توندىرگەن. جۇرگىزۋشىگە قاتىستى ءۇش اكىمشىلىك حاتتاما، ال جولاۋشىلارعا قاتىستى تاعى ەكى اكىمشىلىك حاتتاما تولتىرىلدى. كولىك تە ارنايى ايىپپۇل تۇراعىنا قويىلدى.
پوليسيا جول قوزعالىسىنا قاتىسۋشىلاردى جول ەرەجەلەرىن قاتاڭ ساقتاۋعا شاقىرادى. «ءقاۋىپتى مانەۆرلەر، كولىكتى ادەيى كورسەتە باسقارۋ جانە جولاۋشىلاردى بەلگىلەنگەن تالاپتاردى بۇزا وتىرىپ تاسىمالداۋ ازاماتتاردىڭ ءومىرى مەن دەنساۋلىعىنا ناقتى قاتەر توندىرەدى»، — دەپ مالىمدەدى ءىىم.