اقتوبەدە قازاقستانداعى تۇڭعىش مۋلتيبرەندتىك KAMAZ سەرۆيس ورتالىعىنىڭ قۇرىلىسى باستالدى. نىسان وڭتۇستىك اينالما جولدىڭ بويىندا ورنالاسىپ، اۋىر جانە ارنايى تەحنيكاعا قىزمەت كورسەتۋگە باعىتتالادى، دەپ حابارلايدى infohub.kz سايتى.
جوباعا سالىناتىن جالپى ينۆەستيسيا كولەمى 3،5 ملرد تەڭگەگە باعالانىپ وتىر. كاسىپورىن ىسكە قوسىلعاندا وڭىردە 70 جاڭا جۇمىس ورنى اشىلادى. بەكىتىلگەن جوسپارعا سايكەس، سەرۆيس ورتالىعىنىڭ قۋاتى جىلىنا 5 مىڭعا دەيىن وپەراسيا جاساۋعا مۇمكىندىك بەرەدى. جوبا باستاماشىسىنىڭ مالىمەتىنشە، نىسان قازاقستانداعى وسىنداي گيبريدتىك فورماتتاعى العاشقى سەرۆيس ورتالىعى بولادى.
اقتوبە وبلىسى اكىمىنىڭ ورىنباسارى ابزال ابدىكارىموۆ قۇرىلىس الاڭىنا بارىپ، ينۆەستورلاردىڭ نازارىن جۇمىستىڭ ساپالى ورىندالۋى قاجەتتىگىنە اۋداردى.
«كاسىپكەرلەر مەن شاعىن جانە ورتا بيزنەس وكىلدەرىن قولداۋ — ءبىزدىڭ باستى مىندەتتەرىمىزدىڭ ءبىرى. جۇمىستى توقتاتپاي، جوبانى بەلگىلەنگەن مەرزىمدە اياقتاۋ ماڭىزدى»، — دەدى ابزال ابدىكارىموۆ ساپار بارىسىندا.
اقتوبە وبلىسى اكىمدىگىنىڭ رەسمي حابارلاماسىندا جوبانىڭ ناقتى زاڭدى تۇلعاسى نەمەسە يەسى اشىلمادى.
«كاماز» ااق — اۋىر جۇك كولىكتەرىن شىعاراتىن رەسەيلىك ءوندىرۋشى. ەڭ ءىرى ۇلەسكەر — كاسىپورىن اكسيالارىنىڭ 47،1%-ى تيەسىلى رەسەيلىك «روستەح» مەملەكەتتىك كورپوراسياسى. قازاقستاندا برەند تاريحي تۇردە «كاماز-ينجينيرينگ» اق قۇراستىرۋ كاسىپورنى (كوكشەتاۋ قالاسىندا تەحنيكا شىعارۋ) جانە KamLitKZ زاۋىتى (جۇك كولىكتەرىنە شويىن قۇيۋ ءونىمىن شىعارۋ) ارقىلى تانىلعان.
بۇعان دەيىن قازاقستاندىق قۇراستىرۋ كاسىپورنىنىڭ قۇرىلتايشىلارى رەسەيلىك «كاماز» ااق (باقىلاۋ پاكەتى) جانە «قازاقستان ينجينيرينگ» ۇلتتىق كومپانياسى بولعان. الايدا 2025 جىلدىڭ سوڭىندا رەسەيلىك اۆتوكونسەرن بيزنەستى قايتا قۇرىلىمداۋ جانە سانكسيالىق تاۋەكەلدەردى ازايتۋ اياسىندا قازاقستاندىق «ەنشىلەس» كومپانياسىنىڭ ءىرى تىكەلەي ۇلەسكەرلەرى قاتارىنان شىعىپ، اكتيۆتەردى جەكە قۇرىلىمدارعا بەردى.