اقتوبە وبلىسىندا گازەلەكتردانەكەرلەۋشى جۇمىس بارىسىندا كوتەرگىش مەحانيزمنەن (ليفتتەن) قۇلاپ، اۋىر جاراقات الدى. وقيعا وندىرىستە بولعان، ودان كەيىن زارداپ شەگۋشى جازاتايىم وقيعا بويىنشا ارنايى تەرگەۋ ناتيجەلەرىنە داۋ ايتتى، دەپ حابارلايدى infohub.kz سايتى.
اقتوبە وبلىسى سوتتارىنىڭ رەسمي Telegram-ارناسىندا حابارلانعانداي، ارنايى تەرگەۋ كوميسسياسى جۇمىس بەرۋشىنىڭ كىناسىن 80%، ال جۇمىسشىنىڭ كىناسىن 20% دەپ انىقتاپ، سوڭعىسىنىڭ ورەسكەل ابايسىزدىعىن نەگىزگە العان. الايدا سوت جۇمىس بەرۋشىنىڭ جۇمىسشىنى قاۋىپسىزدىك جانە ەڭبەكتى قورعاۋ بويىنشا مىندەتتى نۇسقاۋلىقسىز جۇمىسقا جىبەرگەنىن، ءقاۋىپسىز ەڭبەك جاعدايلارىن قامتاماسىز ەتپەگەنىن جانە جۇمىستى ءتيىستى تۇردە ۇيىمداستىرماعانىن انىقتادى. جۇمىسشىنىڭ ورەسكەل ابايسىزدىعى تۋرالى دالەلدەر تابىلمادى.
ناتيجەسىندە اقتوبە وبلىسىنىڭ سماس جۇمىسشىنىڭ اكىمشىلىك تالابىن قاناعاتتاندىرىپ، كىنا دارەجەسىن ءبولۋ بولىگىندە ارنايى تەرگەۋ اكتىسىن زاڭسىز دەپ تانىدى، جازاتايىم وقيعانىڭ سەبەبى جۇمىس بەرۋشىنىڭ ءقاۋىپسىز ەڭبەك جاعدايلارىن قامتاماسىز ەتپەۋى ەكەنىن كورسەتتى. جۇمىس بەرۋشىنىڭ كىناسى 100%، جۇمىسشىنىڭ كىناسى 0% دەپ بەلگىلەندى.
اقتوبە وبلىستىق سوتىنىڭ قاۋلىسىمەن سماس شەشىمى وزگەرىسسىز قالدىرىلدى. اكىمشىلىك ىستەر جونىندەگى كاسساسيالىق سوت سوتتاردىڭ تۇجىرىمدارىمەن كەلىسىپ، جازاتايىم وقيعانىڭ ءمان-جايلارىن، سەبەپتىك بايلانىستى جانە تاراپتاردىڭ كىنا دارەجەسىن انىقتاۋ ارنايى تەرگەۋ اكتىسىنىڭ زاڭدىلىعىن تەكسەرۋ كەزىندە سوتتىڭ قۇزىرەتىنە جاتاتىنىن اتاپ ءوتتى.