اقتوبە وبلىسىندا جەرگىلىكتى تۇرعىنعا قاتىستى ۇكىم شىقتى. ول شالقاردىڭ ەكس-اكىمىنە 8 ملن تەڭگەگە اقتالۋ ۇكىمىن شىعارىپ بەرەمىن دەپ ۋادە بەرىپ، الداپ كەتكەن. بۇل تۋرالى infohub.kz سايتى حابارلايدى.
«دياپازون» باسىلىمىنىڭ مالىمەتىنشە، پوليسياعا بۇرىنعى شالقار قالاسىنىڭ اكىمى ارىزدانعان. ول بۇعان دەيىن 4 جىلعا باس بوستاندىعى شەكتەلگەن ەدى. ول ۇكىممەن كەلىسپەگەندىكتەن، كومەكتەسە الاتىن ادامداردى ىزدەگەن. تۋىسى وعان زاڭ كومەگىن كورسەتە الاتىن ايەل ادۆوكات قالامقاس س.-نى ۇسىنعان. ول اكەسىمەن بىرگە ونىڭ ۇيىنە بارىپ، ادۆوكات اقتالۋ ۇكىمىنە قول جەتكىزۋگە ۋادە بەرىپ، قىزمەتى ءۇشىن 8 ملن تەڭگە سۇراعان. ول سومانىڭ جارتىسىن بەرگەن، ءبىر اپتادان كەيىن ادۆوكات ماسەلە شەشىلىپ جاتقانىن، وڭ شەشىم شىققاندا قالعان اقشانى تولەۋ كەرەكتىگىن ايتقان. الايدا ماسەلە شەشىلمەگەن، ەر ادام اقتالماعان.
باسىلىمدا اتاپ وتىلگەندەي، بۇرىنعى اكىم ونىمەن كەلىسىمشارت جاساماعان جانە اقشانى تۇبىرتەكسىز بەرگەن. ال ادۆوكات 4 ملن تەڭگەنى قارىزعا العانىن ايتقان. ونىڭ قىلمىستىق ىسىندە پاتەر الاياقتىعى ەپيزودتارى دا بولعان، ءبىراق بۇل جولى ول سىبايلاسىمەن بىرگە ارەكەت ەتكەن.
سوڭىندا ءىس ايىپتاۋ ۇكىمىمەن اياقتالعان. 54 جاستاعى قالامقاس س. الاياقتىعى ءۇشىن 6 جىلعا باس بوستاندىعىنان ايىرىلدى، ۇكىم جاريالانعاننان كەيىن بىردەن قاماۋعا الىندى. ونىڭ سىبايلاسى اقبوتا ت. دا 6 جىلعا سوتتالدى، ءبىراق كامەلەتكە تولماعان بالاسى بولعاندىقتان، جازاسىن وتەۋ ءۇش جىلعا كەيىنگە شەگەرىلدى. سوت سوتتالعانداردى زارداپ شەككەندەرگە كەلتىرىلگەن زالالدى وتەۋگە مىندەتتەدى.