اقتوبەدە «قۇقىقتىق ءتارتىپ» جەدەل-الدىن الۋ ءىس-شاراسى اياسىندا پوليسيا قىزمەتكەرلەرى قالاداعى تۇنگى كلۋبتاردىڭ بىرىندە جەدەل تەكسەرۋ جۇرگىزدى. تەكسەرۋ ناتيجەسىندە قۇقىق بۇزۋشىلىق فاكتىلەرى انىقتالىپ، تىيىم سالىنعان زاتتار الىندى، دەپ حابارلايدى infohub.kz سايتى.
وڭىرلىك پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، پروكۋراتۋرانىڭ ۇيلەستىرۋىمەن ءتىنتۋ ءىس-شارالارى جۇرگىزىلدى. كلۋب ءۇي-جايىنان، اتاپ ايتقاندا ەرلەر دارەتحاناسىنان ەسىرتكىگە ۇقساس زاتتارى بار ءۇش وراما تابىلىپ، الىندى. سونىمەن قاتار، مەتالل كاستەت پەن ەكى قاتپارلى پىشاق تاركىلەندى.
بار سورەسىنىڭ جانىنان ءتورت كاليان تابىلدى. سونداي-اق، تەكسەرۋ كەزىندە كلۋبتا 2009 جىلى تۋعان كامەلەتكە تولماعان بالا بولعانى انىقتالدى، بۇل كامەلەتكە تولماعانداردىڭ تۇنگى ۋاقىتتا ويىن-ساۋىق مەكەمەلەرىندە بولۋىنا زاڭدىق تىيىم سالۋدى بۇزۋ بولىپ تابىلادى.
انىقتالعان فاكتىلەر بويىنشا مەكەمە اكىمشىلىگىنە ق ر اقبتك-نىڭ 132-بابى (كامەلەتكە تولماعاننىڭ تۇنگى ۋاقىتتا ويىن-ساۋىق مەكەمەسىندە بولۋىنا جول بەرۋ)، 441-بابىنىڭ 1-بولىگى (تەمەكى بۇيىمدارىن، ونىڭ ىشىندە قىزدىرىلاتىن تەمەكىنى تۇتىنۋعا تىيىم سالۋدى بۇزۋ) جانە 200-بابىنىڭ 1-بولىگى (الكوگول ءونىمىن وتكىزۋ سالاسىنداعى ق ر زاڭناماسى تالاپتارىن بۇزۋ) بويىنشا اكىمشىلىك قۇقىق بۇزۋشىلىق تۋرالى حاتتامالار جاسالدى.
سونىمەن قاتار، تەكسەرۋ مەكەمە كۇزەتشىلەرىنىڭ ەڭبەك شارتتارىن جاساسپاي جۇمىس ىستەگەنىن كورسەتتى. پوليسيا بولىمىنە 17 ادام جەتكىزىلدى.
الىنعان زاتتاردىڭ قۇرامى مەن ەسىرتكىگە نەمەسە وزگە دە اينالىمى تىيىم سالىنعان زاتتارعا جاتاتىنىن انىقتاۋ ءۇشىن ساراپتاماعا جىبەرىلدى. قازىرگى ۋاقىتتا وقيعانىڭ بارلىق ءمان-جايىن جانە تىيىم سالىنعان زاتتاردىڭ زاڭسىز اينالىمىنا قاتىسى بار ادامداردى انىقتاۋعا، سونداي-اق ىقتيمال قۇقىققا قارسى ارەكەتتەردى قۇجاتتاندىرۋعا باعىتتالعان تەرگەۋ ءىس-شارالارى جۇرگىزىلۋدە.
ساراپتامالار مەن تەرگەۋ ارەكەتتەرىنىڭ ناتيجەلەرى بويىنشا قازاقستان رەسپۋبليكاسىنىڭ زاڭناماسىنا سايكەس قاتىسى بار ادامداردىڭ ارەكەتتەرىنە قۇقىقتىق باعا بەرىلەتىن بولادى.