اقتوبەدە تۋريستىك كومپانيانىڭ ونداعان كليەنتى جولداما اقىسىن تولەگەننەن كەيىن دەمالىسقا ۇشا الماعانىن مالىمدەدى. زارداپ شەككەندەردىڭ ايتۋىنشا، كومپانيا بايلانىسقا شىعۋدى توقتاتقان، ال جالپى شىعىن كولەمى 219 ملن تەڭگەگە جەتۋى مۇمكىن، دەپ حابارلايدى infohub.kz سايتى.
زارداپ شەككەندەردىڭ ءبىرى دينارا قاتان چەكتەر مەن وزگە دە راستايتىن قۇجاتتاردى جيناعانىن ايتتى. «جالپى شىعىن كولەمى – 219 ميلليون. بىزدە ءتىزىم، چەكتەر – ءبارى بار. بارلىعى ارىز جازدى. ءبىزدىڭ تالابىمىز – ءبارى زاڭدى بولۋى جانە اقشامىزدى قايتارۋى»، – دەدى ول.
تاعى ءبىر كليەنت اسىلبەك دۇيسەنبەكوۆ 5-13 تامىز ارالىعىندا انتالياعا وتباسىلىق تۋر ساتىپ العانىن حابارلادى. ۇشۋ الماتىدان جۇزەگە اسۋى كەرەك ەدى. «ءبىز وتباسىمىزبەن الماتىعا كەلدىك، بيلەتتەردى جىبەرەمىز دەپ ۋادە بەردى. ءبىراق ۇشۋدان ءبىر كۇن بۇرىن تۋرىمىزدىڭ كۇشى جويىلعانىن حابارلادى. مەن كومپانياعا شامامەن 2 ملن تەڭگە تولەدىم»، – دەدى ول.
كليەنتتەردىڭ سوزىنشە، ولار تۇركيا، مىسىر جانە گرۋزيادا دەمالىستى جوسپارلاعان. كەيبىرەۋلەرى بۇعان دەيىن وسى كومپانيانىڭ قىزمەتىن پايدالانىپ، شەتەلگە ءساتتى ساپارلاعان، سوندىقتان تانىستارىنىڭ ۇسىنىسىمەن تاعى دا وسى كومپانياعا جۇگىنگەن.
تۋريستەردىڭ ءبىر بولىگى جولدامالاردى ءبولىپ تولەۋ ارقىلى راسىمدەپ، ءقازىر ساپار وتپەگەنىنە قاراماستان قارىزدى تولەۋدى جالعاستىرۋدا. سونىمەن قاتار، كوپشىلىگى حالىقارالىق رەيستەر جوسپارلانعان الماتىعا دەيىنگى جول اقىسىن ءوز بەتىنشە تولەگەن.
زارداپ شەككەندەر الدىمەن كومپانيا قىزمەتكەرلەرى كەزدەسۋلەردى كەيىنگە شەگەرىپ، ساپار ماسەلەسىن شەشەمىز دەپ ۋادە بەرگەنىن، الايدا كەيىن قوڭىراۋلار مەن حابارلامالارعا جاۋاپ بەرۋدى توقتاتقانىن ايتادى.
پوليسياعا العاشقى ارىز 6 تامىزدا تۇسكەن. قازىرگى ۋاقىتتا رەسمي تۇردە 17 ادام ءوتىنىش بىلدىرگەن.
اقتوبە وبلىسى پوليسيا دەپارتامەنتىندە الاياقتىق بابى بويىنشا سوتقا دەيىنگى تەرگەۋ جۇرگىزىلىپ جاتقانىن حابارلادى. «سونداي-اق، تۇلعاسى انىقتالعان كۇدىكتىنىڭ ورنالاسقان جەرىن انىقتاۋ بويىنشا جەدەل-ىزدەستىرۋ ءىس-شارالارى جۇرگىزىلۋدە»، – دەدى اقتوبە وبلىسى پد ءباسپاسوز قىزمەتىنىڭ جەتەكشىسى ەربولات سارقۇلوۆ.
تۋريستىك كومپانيا يەسىنىڭ ورنالاسقان جەرىن ءقازىر قۇقىق قورعاۋ ورگاندارى انىقتاپ جاتىر.