اقتوبەدە ۆەلوكۋرەر 12 جاسار قىزدى قاعىپ، وقيعا ورنىنان قاشىپ كەتتى. زارداپ شەككەن قىزدىڭ اناسى بولعان وقيعانىڭ ءمان-جايىن ايتىپ بەردى، دەپ حابارلايدى infohub.kz.
وقيعا «سازدى» اۋدانىندا بولعان. قىز ءۇيىنىڭ ماڭىندا ۆەلوسيپەدپەن جۇرگەن. اناسىنىڭ ايتۋىنشا، وعان ەرەسەك ەر ادام باسقارعان ەلەكتروۆەلوسيپەد سوققان. بالانى قاعىپ كەتسە دە، ول توقتاماي، ءارى قاراي ءجۇرىپ كەتكەن. جەدەل جاردەمدى كەزدەيسوق ءوتىپ بارا جاتقاندار شاقىرعان.
زارداپ شەككەن قىزدى وبلىستىق بالالار اۋرۋحاناسىنا جەتكىزگەن. دارىگەرلەر جوعارعى جاق سۇيەگىنىڭ جانە بەت سۇيەگىنىڭ سىنۋىن، سونداي-اق الدىڭعى تىستەرىنىڭ سىنىپ قالعانىن انىقتاعان. قىزعا وپەراسيا جاسالعان، ءقازىر ول جاقسارىپ كەلەدى، ءبىراق الدا ۇزاق قالپىنا كەلتىرۋ كەزەڭى كۇتىپ تۇر. اناسىنىڭ ايتۋىنشا، جاقىن ارادا ءتىس پروتەزدەۋ مۇمكىن ەمەس، تەك ەرەسەك كەزىندە عانا يمپلانت قويۋعا بولادى.
بەينەباقىلاۋ كامەرالارىنىڭ ارقاسىندا كىنالىنى دەرەۋ انىقتاعان. ول 58 جاستاعى جەرگىلىكتى تۇرعىن بولىپ شىقتى. زارداپ شەككەن قىزدىڭ اناسى وعان ەڭ قاتاڭ جازا قولدانۋدى تالاپ ەتەدى. ول قىزىنىڭ قاتتى شوك پەن اۋىرسىنۋدى باستان وتكەرگەنىن، ەندى ونى ۇزاق ەمدەۋ كۇتىپ تۇرعانىن اتاپ ءوتتى.
وبلىستىق قوعامدىق دەنساۋلىق ساقتاۋ باسقارماسى بالانىڭ جاعدايىنا قاتىستى تۇسىنىكتەمە بەردى. ءبولىم مەڭگەرۋشىسى ءاليا شارباكوۆانىڭ ايتۋىنشا، جاق-بەت حيرۋرگىنىڭ تەكسەرۋىنەن كەيىن قىز شۇعىل تۇردە اۋرۋحاناعا جات قىزىلىپ، وپەراسيا جاسالعان. بارلىق قاجەتتى مەديسينالىق كومەك كورسەتىلگەن، وڭ ديناميكا بايقالادى: ىسىك باسىلعان، جارالار جازىلىپ جاتىر. ناۋقاس امبۋلاتوريالىق ەمدەۋگە شىعارىلعان، ورتوپەديالىق جانە ستوماتولوگيالىق ەمدەۋ ۇسىنىلعان.
ەسكە سالا كەتەيىك، بۇعان دەيىن اقتوبەدە بالانى قاعىپ، جول اپاتى ورنىنان قاشىپ كەتكەن ۆەلوكۋرەردى ىزدەگەنى حابارلانعان بولاتىن. پوليسەيلەر ەلەكتروۆەلوسيپەد جۇرگىزۋشىسىنىڭ جەكە باسىن انىقتادى.