اقتوبە وبلىسىنداعى قۇتيكول — جارما — قۇيىلىس — جايسانباي اۆتوجولىنىڭ 23 شاقىرىمىن جوندەۋ 2021 جىلدان بەرى جالعاسىپ كەلەدى، ءالى كۇنگە دەيىن جول پايدالانۋعا بەرىلگەن جوق، دەپ حابارلايدى infohub.kz.
ماسەلە قۇتيكول اۋىلى تۇرعىندارىنىڭ جينالىسىندا كوتەرىلدى. جەرگىلىكتى تۇرعىندار اۋىلدى اۋدان ورتالىعىمەن بايلانىستىراتىن جولدىڭ جوندەلۋى بىرنەشە جىلعا سوزىلعانىنا شاعىمداندى.
ولاردىڭ ايتۋىنشا، جوسپارلانعان جۇمىستاردىڭ جارتىسىنا جۋىعى ورىندالعان، الايدا بيىل قۇرىلىس ءىس جۇزىندە جالعاسقان جوق.
«مەردىگەر كومپانيا وكىلدەرىنىڭ ايتۋىنشا، تاپسىرىس بەرۋشى — ىرعىز اۋدانى اكىمدىگى قاجەتتى قاراجاتتى اۋدارماعان. ال اۋدان اكىمدىگى اۋداراتىن اقشا جوق دەيدى»، — دەدى تۇرعىندار.
ولار جولدىڭ جاعدايىنا تەك قۇتيكولدىڭ كولىكتىك قولجەتىمدىلىگى عانا ەمەس، جارما، قۇيىلىس جانە جايسانباي اۋىلدارى تۇرعىندارىنىڭ اۋدان ورتالىعىمەن بايلانىسى دا بايلانىستى ەكەنىن اتاپ ءوتتى. وسى جول ارقىلى جەرگىلىكتى تۇرعىندار مەديسينالىق جانە ءبىلىم بەرۋ مەكەمەلەرىنە دە جەتەدى.
اقتوبە وبلىسى جولاۋشىلار كولىگى جانە اۆتوموبيل جولدارى باسقارماسى جوندەۋ جوباسى 2021 جىلى بەكىتىلگەنىن حابارلادى.
2022 جىلى جولدى ورتاشا جوندەۋگە 267 ملن تەڭگە ءبولىندى. مەردىگەر «اباي-ب» ج ش س بولدى، الايدا كومپانيا كەلىسىمشارتتىق مىندەتتەمەلەرىن ورىندامادى. كەيىن بولىنگەن قاراجات سوت ارقىلى قايتارىلدى.
2023 جىلدان باستاپ جۇمىستار ۋاقىتشا توقتاتىلدى. 2024 جىلى جوبا قايتا قارالىپ، جولدىڭ ەكى ۋچاسكەسىنە 900 ملن تەڭگە قاراستىرىلدى. 2025 جىلى بۇل قاراجات تولىق يگەرىلدى.
اكىمدىكتە 2026 جىلى ورىندالعان جۇمىستار اكتىلەرىن قابىلداپ، تاعى 100 ملن تەڭگە اۋدارۋ جوسپارلانىپ وتىرعانىن حابارلادى.
«2025 جىلى جول توسەمىن دايىنداۋ جانە تەگىستەۋ جۇمىستارى ورىندالىپ، قاجەتتى قۇرىلىس ماتەريالدارى دايىندالدى. بيىل جول جيەكتەرىن ورناتۋ جانە اسفالتبەتون جابىنىن توسەۋ جۇمىستارىن اياقتاۋ جوسپارلانۋدا»، — دەپ حابارلادى اقتوبە وبلىسى اكىمدىگى.
جوندەۋدى جالعاستىرۋ ءۇشىن «تۇلكىباس جولدارى» جشس-مەن كەلىسىمشارت جاسالدى. بيلىك وكىلدەرى قارجىلاندىرۋ تولىق كولەمدە قاراستىرىلعانىن، اقشا جۇمىستار ورىندالىپ، راستالعان سايىن اۋدارىلاتىنىن مالىمدەدى.
قاجەتتى قۇرىلىس ماتەريالدارى ايتەكە بي اۋدانىنداعى قارابۇتاق اۋىلىنداعى اسفالتبەتون زاۋىتىندا دايىندالعان.
بيلىك جولدىڭ بارلىق 23 شاقىرىمىن جوندەۋدى 2026 جىلدىڭ سوڭىنا دەيىن اياقتاۋعا ۋادە بەردى.