اقتوبە قالالىق سوتى جۇمىس بەرۋشىنى جاراقات العان قىزمەتكەرگە مورالدىق شىعىننىڭ ورنىن تولتىرۋ رەتىندە 10 ميلليون تەڭگە تولەۋگە مىندەتتەدى. ەر ادام وندىرىستەگى جازاتايىم وقيعا سالدارىنان اۋىر جاراقات الىپ، مۇگەدەك بولىپ قالدى، دەپ حابارلايدى infohub.kz سايتى.
سوت وتىرىسى بارىسىندا وقيعا جۇمىس بەرۋشىنىڭ كىناسىنەن بولعانى انىقتالدى. ول ءقاۋىپسىز ەڭبەك جاعدايىن قامتاماسىز ەتپەگەن جانە ەڭبەكتى قورعاۋ سالاسىنداعى زاڭناما تالاپتارىن ساقتاماعان. ناتيجەسىندە جۇمىسشى اۋىر دەنە جاراقاتىن العان.
ءىس قۇجاتتارى مەن مەديسينالىق ساراپتاما قورىتىندىلارىنا سايكەس، تالاپكەرگە II توپ مۇگەدەكتىگى بەلگىلەنىپ، كاسىبي ەڭبەككە قابىلەتتىلىگىنىڭ جوعالۋ دارەجەسى 80 پايىزدى قۇراعان.
سوت ۇسىنىلعان دالەلدەمەلەردى باعالاي كەلە، تالاپكەردىڭ تالاپتارىن ءىشىنارا نەگىزدى دەپ تانىدى. مورالدىق شىعىننىڭ مولشەرىن انىقتاۋ كەزىندە الىنعان جاراقاتتاردىڭ سيپاتى مەن اۋىرلىعى، ەمدەلۋ ۇزاقتىعى، مۇگەدەكتىكتىڭ بەلگىلەنۋى، فيزيكالىق جانە رۋحاني ازاپتىڭ دارەجەسى، سونداي-اق ەڭبەك قىزمەتىن جۇزەگە اسىرۋ مۇمكىندىگىنىڭ ايتارلىقتاي شەكتەلۋى جانە بۇرىنعى ءومىر سالتىنىڭ بۇزىلۋى ەسكەرىلدى.
سوت شەشىمىمەن جۇمىس بەرۋشىدەن تالاپكەردىڭ پايداسىنا 10 ميلليون تەڭگە كولەمىندە مورالدىق شىعىن وتەماقىسى، سونداي-اق دارى-دارمەك پەن ەمدەلۋگە بايلانىستى كولىك شىعىندارىن قامتيتىن 255 مىڭ تەڭگە كولەمىندەگى ماتەريالدىق زالال ءوندىرىلدى.
سوت شەشىمى زاڭدى كۇشىنە ءالى ەنگەن جوق.