سوڭعى كەزدەرى قازاقستاندىقتارعا «كەپىلدى تابىس» پەن «تاۋەكەلسىز ينۆەستيسيا» ۇسىناتىن الاياقتاردىڭ حابارلامالارى ءجيى كەلىپ جاتىر. بۇل تۋرالى Polisia.kz-كە سىلتەمە جاساپ، infohub.kz سايتى حابارلايدى.
Polisia.kz Telegram-ارناسىندا اتاپ وتىلگەندەي، الاياقتار الەۋمەتتىك جەلىلەر ارقىلى ازاماتتاردى كۇماندى ينۆەستيسيالىق جوبالارعا قاتىسۋعا شاقىرادى. ولار وزدەرىن بروكەر، ينۆەستيسيالىق كومپانيا قىزمەتكەرى نەمەسە قارجى ساراپشىسى رەتىندە تانىستىرىپ، «جوعارى تابىس»، «كەپىلدى پايدا» جانە «تاۋەكەلسىز ينۆەستيسيا» ۋادە ەتەدى. الدىمەن قۇربانعا از عانا سوما سالۋدى ۇسىنادى، سودان كەيىن جالعان سايت نەمەسە قوسىمشا ارقىلى اقشانىڭ ءوسىپ جاتقانىن كورسەتەدى. كەيىن «ينۆەستيسيانى ۇلعايتۋ»، «كوميسسيا تولەۋ» نەمەسە «شوتتى قايتا اشۋ» سىلتاۋىمەن قوسىمشا اقشا اۋدارۋدى تالاپ ەتەدى.
ادام اقشانى شىعارۋعا تىرىسقاندا، سايت جۇمىسىن توقتاتادى، اككاۋنت بۇعاتتالادى، ال «كەڭەسشى» ءىز-تۇزسىز جوعالادى. ناتيجەسىندە ازامات سالعان بارلىق اقشاسىنان ايىرىلادى.
الاياقتىق جاعدايلارىنىڭ كوبەيۋىنە بايلانىستى ىشكى ىستەر مينيسترلىگى قازاقستاندىقتارعا ەسكەرتۋ جاسادى. قۇقىق قورعاۋ ورگاندارى 100% كەپىلدىكپەن جوعارى تابىس ۋادە ەتەتىندەرگە سەنبەۋگە، «بىرنەشە كۇندە اقشانى بىرنەشە ەسە كوبەيتۋ» ۇسىنىستارىنان ساق بولۋعا، شۇعىل شەشىم قابىلداۋدى تالاپ ەتەتىن ادامدارعا سەنبەۋگە، بەيتانىس ادامداردىڭ نۇسقاۋىمەن اقشا اۋدارماۋعا، بانك كارتاسىنىڭ دەرەكتەرىن، CVV-كود پەن SMS-كودتاردى ەشكىمگە ايتپاۋعا، كۇدىكتى سىلتەمەلەرگە وتپەۋگە جانە بەلگىسىز قوسىمشالاردى ورناتپاۋعا شاقىرادى.