الاكول كولىنىڭ اكۆاتورياسى مەن جاعالاۋىندا ءولى بالىق تابىلىپ، جەرگىلىكتى تۇرعىندار مەن الەۋمەتتىك جەلى قولدانۋشىلارىنىڭ الاڭداۋشىلىعىن تۋدىردى. ماماندار بولعان وقيعانىڭ سەبەبىن انىقتاۋ ءۇشىن قاجەتتى زەرتتەۋلەر جۇرگىزدى، دەپ حابارلايدى infohub.kz سايتى.
بىرنەشە كۇن بۇرىن قازاقستاندىقتار الەۋمەتتىك جەلىلەردە الاكول كولىنەن جانە ونىڭ جاعاسىنان تابىلعان ءولى بالىقتاردىڭ ۆيدەولارىن جاريالاي باستادى. بۇل حابارلامالارعا بالقاش-الاكول وبلىسارالىق بالىق شارۋاشىلىعى باسسەيندىك ينسپەكسياسى جەدەل جاۋاپ بەردى. ماماندار تابىلعان جەردەن سۋ سىنامالارى مەن ءولى بالىق ۇلگىلەرىن الىپ، زەرتتەۋ، ساراپتاما جانە تالداۋ جۇرگىزۋ ءۇشىن «بالىق شارۋاشىلىعى عىلىمي-وندىرىستىك ورتالىعى» جشس-نە جىبەردى.
ءبعوو قورىتىندىسىنا سايكەس، سۋ سىنامالارىن زەرتتەۋ ناتيجەلەرى بويىنشا سۋدىڭ جاعدايى قالىپتى شەكتە ەكەنى جانە بالىق ءولىمىنىڭ سەبەبى بولماعانى انىقتالدى. سونىمەن قاتار، ءولى بالىق ۇلگىلەرىن تالداۋ ولاردىڭ كاسىپتىك ولشەمنەن كىشى ەكەنىن جانە زاقىمدانۋلار مەن اۋلاۋ قۇرالدارىنىڭ ىزدەرىن قوسا العاندا، مورفو-بيولوگيالىق بەلگىلەرى بار ەكەنىن كورسەتتى. وسىعان بايلانىستى ماماندار بالىق ءولىمىنىڭ سەبەبى ەكولوگيالىق فاكتورلار ەمەس، اۋلاۋ قۇرالدارىنىڭ (تورلاردىڭ) مەحانيكالىق اسەرى بولدى دەگەن قورىتىندىعا كەلدى.
ينسپەكسيادا سونداي-اق ءولى بالىقتى بەلگىسىز ادامدار سۋ ايدىنىنان شىعارىپ، جاعاعا تاستاپ كەتكەنىن حابارلادى. مۇنداي جاعدايلاردىڭ الدىن الۋ جانە براكونەرلىككە جول بەرمەۋ ماقساتىندا جەرگىلىكتى اتقارۋشى ورگاندار مەن بالىق شارۋاشىلىعى سۋبەكتىلەرىنە پروفيلاكتيكالىق ءىس-شارالار وتكىزۋ تۋرالى نۇسقامالار بەرىلدى. قازىرگى ۋاقىتتا سۋ ايدىندارىندا بالىق ءولىمى فاكتىلەرى تىركەلگەن جوق.
بۇعان دەيىن قازاقستاندىقتار الەۋمەتتىك جەلىلەردە الاكول كولىنىڭ اكۆاتورياسى مەن جاعاسىنان ءولى بالىق تابىلعانى تۋرالى ۆيدەولار جاريالاعانى حابارلانعان بولاتىن.