جەتىسۋ وبلىسىنداعى الاكول كولىنىڭ جاعالاۋى قازاقستانداعى ەڭ تانىمال دەمالىس ورىندارىنىڭ ءبىرى بولىپ قالا بەرەدى. وڭىرگە جۇمىس ساپارى اياسىندا تۋريزم جانە سپورت ۆيسە-مينيسترى ميراس تولەبايەۆ وبلىس اكىمىنىڭ ورىنباسارى مارلەن كولباەۆپەن بىرگە كۋرورتتىق ايماقتى تەكسەرىپ، ينفراقۇرىلىمدىق وزگەرىستەردى، سانيتارلىق جاعدايدى جانە قاۋىپسىزدىك شارالارىن باعالادى، دەپ حابارلايدى infohub.kz سايتى.
وتكەن ماۋسىمداردىڭ قورىتىندىسى بويىنشا الاكول تانىمالدىلىعىنىڭ تۇراقتى ءوسۋىن كورسەتىپ وتىر. ىشكى تۋريستىك اعىم 382 مىڭ ادامعا جەتىپ، 11%-عا وسكەن. شەتەلدىكتەر تاراپىنان دا قىزىعۋشىلىق ايتارلىقتاي ارتتى — شەتەلدىك قوناقتار سانى 60%-عا ءوسىپ، 8،2 مىڭ ادامدى قۇرادى. قازىرگى تاڭدا جاعالاۋدا 224 ورنالاستىرۋ نىسانى جۇمىس ىستەيدى، ولار ءبىر ۋاقىتتا 21 مىڭنان استام دەمالىسۋشىنى قابىلداي الادى.
تەكسەرۋ بارىسىندا ەلەكترمەن جابدىقتاۋ نىساندارىنىڭ قۇرىلىسى اياقتالعانى، اقشي اۋىلىندا كارىز جەلىلەرىنىڭ قۇرىلىسى، سونداي-اق تازارتۋ قۇرىلعىلارى، كوممۋنالدىق جاعاجايلار جانە لەپسى ستانسياسىنداعى جاڭا تەمىرجول ۆوكزالىن سالۋ جۇمىستارى اتاپ ءوتىلدى، دەپ حابارلادى تۋريزم مينيسترلىگىنىڭ ءباسپاسوز قىزمەتى.
قاۋىپسىزدىكتى قامتاماسىز ەتۋ ءۇشىن 40 قۇتقارۋ مۇناراسى، 13 كم بۇيىق جەلىلەرى جانە 7 پيرس جۇمىس ىستەيدى. كۇن سايىن ءتارتىپتى پوليسيا قىزمەتكەرلەرى قامتاماسىز ەتەدى، سۋدا تاۋلىك بويى قۇتقارۋشىلار كەزەكشىلىك ەتەدى. ماۋسىم باستالعاننان بەرى 150-دەن استام پروفيلاكتيكالىق رەيد جۇرگىزىلدى، دەپ قوستى ۆەدومستۆوداعىلار.
ەسكە سالا كەتەيىك، الاكول بيىل رەكوردتىق 2 ملن ءتۋريستى قابىلداي الادى. بۇل تۋرالى ۇكىمەت وتىرىسىندا جەتىسۋ وبلىسىنىڭ اكىمى بەيبىت يسابايەۆ باياندادى.