الماتى وبلىسىنىڭ الاتاۋ قالاسىندا زارداپ شەگۋشى مەن كۋا جالعان ايعاق بەرگەنى ءۇشىن قىلمىستىق ىسكە تارتىلدى، دەپ حابارلايدى infohub.kz.
الماتى وبلىسى سوتتارىنىڭ رەسمي Telegram-ارناسىندا حابارلانعانداي، الاتاۋ قالالىق سوتى زارداپ شەگۋشى مەن كۋانىڭ جالعان ايعاق بەرۋىنە بايلانىستى جەكە قاۋلى شىعاردى.
سوت ادامنىڭ دەنساۋلىعىنا قاساقانا اۋىر زيان كەلتىرۋ (قك 106-بابىنىڭ 1-بولىگى) بويىنشا ايىپتالعان ادامعا قاتىستى قىلمىستىق ءىستى قارادى. ۇكىممەن ول 3 جىل 6 ايعا باس بوستاندىعىنان ايىرىلىپ، جازاسىن ورتاشا قاۋىپسىزدىك مەكەمەسىندە وتەيتىن بولدى.
سوت ءىستى قاراۋ بارىسىندا زارداپ شەگۋشى مەن كۋانىڭ سوتتالۋشىنى جاۋاپكەرشىلىكتەن بوساتۋ ماقساتىندا سوتقا دەيىنگى تەرگەۋ كەزىندە بەرگەن العاشقى ايعاقتارىن وزگەرتكەنىن انىقتادى، دەپ مالىمدەدى سوتتا.
ءىستى قاراۋ ناتيجەسىندە سوت زارداپ شەگۋشى مەن كۋانىڭ ارەكەتتەرىندە ق ر قك 420-بابىندا كوزدەلگەن قىلمىستىق قۇقىق بۇزۋشىلىق بەلگىلەرىنىڭ بولۋىنا بايلانىستى جەكە قاۋلى شىعاردى. 2026 جىلعى 19 ماۋسىمدا الاتاۋ قالاسىنىڭ پوليسيا ءبولىمى زارداپ شەگۋشى مەن كۋاگە قاتىستى قك 420-بابىنىڭ 2-بولىگى (كورىنەۋ جالعان ايعاق بەرۋ) بويىنشا قىلمىستىق ءىس قوزعادى. جەكە قاۋلى زاڭدى كۇشىنە ەندى.