الەمنىڭ ءۇشىنشى راكەتكاسى، يسپانيالىق كارلوس الكاراس 2026 جىلعى اقش اشىق چەمپيوناتىنداعى ونەرىن اياقتادى، دەپ حابارلايدى infohub.kz.
شيرەك فينالدا سپورتشى ATP رەيتينگىندە توعىزىنشى ورىندا تۇرعان امەريكالىق بەن شەلتونمەن كەزدەستى. ماچ ماكسيمالدى بەس سەتكە سوزىلىپ، ونىڭ تورتەۋى تاي-برەيكتە اياقتالدى. اقش وكىلى 6:7 (5:7)، 6:1، 6:3، 1:6، 7:6 (10:7) ەسەبىمەن جەڭىسكە جەتتى.
تەننيسشىلەر كورتتا 4 ساعات 28 مينۋت وتكىزدى. كەزدەسۋ جەرگىلىكتى ۋاقىت بويىنشا تاڭعى 3:33-تە اياقتالدى. بۇل US Open تاريحىنداعى ەڭ كەش اياقتالعان ماچ.
شەلتون مانسابىندا ەكىنشى رەت ۇيدەگى ۇلكەن دۋلىعا ءتۋرنيرىنىڭ جارتىلاي فينالىنا شىقتى. ول فينالعا جولدامانى وتانداسى فرەنسيس تيافومەن ساراپقا سالادى.
الكاراس بولسا، تيتۋلىن قورعاي المادى. ول US Open-دا وتكەن ماۋسىمدا، سونداي-اق 2022 جىلى جەڭىسكە جەتكەن ەدى. يسپانيالىق ءۇشىن بۇل تۋرنير بەس ايعا جۋىق ۋاقىتتاعى العاشقىسى بولدى. وعان دەيىن ول جاراقاتىنان كەيىن قالپىنا كەلىپ، «رولان گارروس» پەن ۋيمبلدوندى وتكىزىپ جىبەرگەن بولاتىن.