2026 جىلعى 14 تامىزدا بولعان ءىرى بلەكاۋتتان كەيىن الماتى قالاسىنىڭ كوممۋنالدىق قىزمەتتەرى كۇشەيتىلگەن رەجيمدە جۇمىس ىستەپ جاتىر، دەپ حابارلايدى infohub.kz.
قالا اكىمدىگىنىڭ مالىمەتىنشە، ەنەرگوجۇيەدەگى قۋات بالانسىنىڭ اۆاريالىق بۇزىلۋىنا بايلانىستى سىرتقى ەلەكترمەن جابدىقتاۋ ۋاقىتشا توقتاتىلعان. بارلىق قىزمەتتەر قالانىڭ تىرشىلىگىن قامتاماسىز ەتۋ ءۇشىن قاجەتتى شارالاردى قابىلداۋدا.
ەلەكتر قۋاتىنىڭ بولماۋىنا بايلانىستى مەتروپوليتەن جۇمىسى ۋاقىتشا توقتاتىلدى. ستانسيالار كونتاكتىلى رەلسكە كەرنەۋ بەرۋ قالپىنا كەلگەنگە دەيىن كىرۋگە جانە شىعۋعا جابىق. قوزعالىستىڭ قايتا جاندانۋى تۋرالى قوسىمشا حابارلانادى.
مەديسينالىق ۇيىمدار ۇزدىكسىز جۇمىس جوسپارلارىنا سايكەس جۇمىسىن جالعاستىرۋدا. ستاسيونارلار رەزەرۆتىك قۋات كوزدەرىمەن — ديزەلدىك گەنەراتورلارمەن جانە ۇزدىكسىز قورەكتەندىرۋ كوزدەرىمەن جابدىقتالعان. ەڭ الدىمەن رەانيماسيا، وپەراسيالىق بولىمشەلەر، قابىلداۋ بولىمشەلەرى جانە باسقا دا ماڭىزدى جابدىقتار رەزەرۆتىك قۋاتپەن قامتاماسىز ەتىلەدى. جەدەل مەديسينالىق كومەك بەلگىلەنگەن تارتىپتە كورسەتىلۋدە.
كەيبىر اۋدانداردا سۋ قىسىمىنىڭ ۋاقىتشا تومەندەۋى جانە سۋمەن جابدىقتاۋدا ۇزىلىستەر بولۋى مۇمكىن، اسىرەسە عيماراتتاردىڭ جوعارعى قاباتتارىندا. بۇل ەلەكتر قۋاتىمەن جۇمىس ىستەيتىن سورعى ستانسيالارىنىڭ توقتاۋىنا بايلانىستى. ەلەكتر قۋاتى قالپىنا كەلتىرىلگەننەن كەيىن سورعى ستانسيالارى ىسكە قوسىلىپ، سۋمەن جابدىقتاۋ بىرتىندەپ قالپىنا كەلەدى.
اكىمدىك قالالىق قىزمەتتەرمەن بىرلەسىپ جاعدايدى باقىلاۋدى جالعاستىرۋدا جانە تىرشىلىكتى قامتاماسىز ەتۋ وبەكتىلەرىنىڭ تۇراقتى جۇمىسى ءۇشىن بارلىق شارالاردى قابىلداۋدا. ءارى قارايعى وزگەرىستەر تۋرالى قوسىمشا حابارلانادى. تۇرعىنداردى سابىرلىق ساقتاۋعا جانە تەك رەسمي اقپارات كوزدەرىنە سەنۋگە شاقىرادى.
ەسكە سالايىق، بۇگىن الماتىدا جانە الماتى وبلىسىندا ءىرى بلەكاۋت بولدى. ەنەرگەتيكا مينيسترلىگىنىڭ دەرەكتەرى بويىنشا، سەبەبى ورتالىق ازيا ەنەرگوجۇيەسى تاراپىنان ەلەكتر ەنەرگياسى اعىنىنىڭ كۇرت وزگەرۋىنەن تۋىنداعان ەنەرگوجۇيەدەگى قۋاتتىڭ ارتۋى بولدى. قارسى اۆاريالىق اۆتوماتيكا ىسكە قوسىلىپ، قازاقستاننىڭ كەيبىر وڭىرلەرىندە ءبىرقاتار تۇتىنۋشىلاردىڭ وشىرىلۋىنە اكەلدى.