الماتىنىڭ الاتاۋ اۋدانىنداعى ءىرى «اقكەنت-3» تۇرعىن ءۇي كەشەنىنىڭ توعىز كوپقاباتتى ءۇيىنىڭ تۇرعىندارى قالا اكىمدىگىنە كومەك سۇراپ جۇگىندى. ولاردىڭ ايتۋىنشا، ۇيلەردىڭ قاسبەتى ءقاۋىپتى جاعدايدا تۇر، دەپ حابارلايدى infohub.kz سايتى.
e-Petition پورتالىندا «اقكەنت-3» تۇرعىن ءۇي كەشەنىنىڭ №45، 46، 47، 48، 50، 51، 52، 53 جانە 54 ۇيلەرىنىڭ تۇرعىندارى پەتيسيا جاريالادى. ولاردىڭ مالىمدەۋىنشە، كوپپاتەرلى تۇرعىن ۇيلەردىڭ قاسبەتى «قاناعاتتانارلىقسىز ءارى ىقتيمال ءقاۋىپتى جاعدايدا».
«كەيبىر ۋچاسكەلەردە قاپتاما پليتالارى قابىرشاقتانىپ، قۇلاپ جاتىر. بۇل تۇرعىنداردىڭ، سونىڭ ىشىندە بالالاردىڭ ءومىرى مەن دەنساۋلىعىنا ناقتى ءقاۋىپ توندىرەدى»، — دەپ جازادى ءوتىنىش اۆتورلارى.
تۇرعىنداردىڭ ايتۋىنشا، اتالعان ۇيلەردەگى پاتەرلەردىڭ ەداۋىر بولىگى مەملەكەتتىك جانە كوممۋنالدىق تۇرعىن ءۇي قورىنا جاتادى، ال كەيبىر ۇيلەردە مەملەكەتتىك تۇرعىن ءۇيدىڭ ۇلەسى شامامەن 70%-دى قۇرايدى.
پەتيسيادا الماتى قالاسىنىڭ اكىمدىگىنەن توعىز ءۇيدىڭ دە قاسبەتىنە تەحنيكالىق تەكسەرۋ جۇرگىزۋدى جانە جەرگىلىكتى بيۋدجەت قاراجاتى ەسەبىنەن كەشەندى كۇردەلى جوندەۋ، رەكونسترۋكسيالاۋ نەمەسە جاڭارتۋ مۇمكىندىگىن قاراستىرۋدى سۇرايدى. بۇل «حالىقتىڭ قاتىسۋىمەن قالىپتاساتىن بيۋدجەت» تەتىگى، ءبىرىڭعاي ساۋلەت كەلبەتىن قالىپتاستىرۋ باعدارلاماسى نەمەسە زاڭنامادا كوزدەلگەن وزگە دە بيۋدجەتتىك تەتىك ارقىلى جۇزەگە اسۋى ءتيىس.
«وسى ماسەلەنى تەك جەكە مەنشىك يەلەرىنە نەسيە ارقىلى شەشۋگە جۇكتەمەي، اتالعان ۇيلەردەگى ءۇي-جايلاردىڭ ءىرى مەنشىك يەسى رەتىندە مەملەكەتتىڭ دە قاتىسۋىن ەسكەرۋدى سۇرايمىز. ەڭ الدىمەن ازاماتتاردىڭ قاۋىپسىزدىگى جانە ىقتيمال جازاتايىم وقيعالاردىڭ الدىن الۋ قاجەتتىلىگى تۋرالى ءسوز بولىپ وتىر»، — دەلىنگەن پەتيسيادا.