الماتىدا «اتاكەنت» كورمە كەشەنىنىڭ ماڭىندا بەلگىسىز ەر ادام بالالار توبىنا شابۋىل جاساعان وقيعانى پوليسيا تەرگەپ جاتىر. مالىمەتتەرگە سايكەس، كۇدىكتى 10 جاسار ۇلدىڭ بەتىنەن ۇرىپ، بالالاردى ولتىرەمىن دەپ قورقىتقان. قۇقىق قورعاۋ ورگاندارى سوتقا دەيىنگى تەرگەۋدى باستادى، دەپ حابارلايدى infohub.kz سايتى.
زارداپ شەككەن بالانىڭ اناسىنىڭ ايتۋىنشا، الدىمەن ەر ادام قىزدى ۇرماق بولعان، ءبىراق ول ۇلگەرىپ قاشىپ كەتكەن. سودان كەيىن ول ونىڭ 10 جاسار ۇلىنىڭ كوزىنە جۇدىرىقپەن سوققى جاساعان. بالانىڭ دەنە جاراقاتى تىركەلگەن، كوزىنىڭ استى كوگەرگەن.
ايەلدىڭ سوزىنشە، باقىتقا وراي، جاقىن جەردە قورعانىس مينيسترلىگىنىڭ بىتىمگەرشىلىك دايارلىق ورتالىعىنىڭ اسكەري قىزمەتشىلەرى بولعان. ولار ەر ادامدى دەرەۋ ۇستاپ، پوليسيانى شاقىرىپ، كەلگەن قىزمەتكەرلەرگە تاپسىرعان.
اسكەري قىزمەتشىلەردىڭ ايتۋىنشا، ۇستاۋ كەزىندە ەر ادام قازاقتاردى جەك كورەتىنىن ايقايلاپ، سودان كەيىن بالالارعا قاراي بەت الىپ، ولاردى «پىشاقتاپ تاستايمىن» دەپ قورقىتقان.
زارداپ شەككەن بالانىڭ اتا-اناسى پوليسياعا ارىز جازعان، بالانىڭ دەنە جاراقاتى تىركەلگەن.
كۇدىكتى ۇستالىپ، پوليسياعا جەتكىزىلدى. قازىرگى ۋاقىتتا وقيعانىڭ بارلىق ءمان-جايى انىقتالىپ جاتىر.
«قازاقستان رەسپۋبليكاسىنىڭ زاڭناماسىنا سايكەس مىندەتتى تۇردە قۇقىقتىق باعا بەرىلىپ، پروسەسسۋالدىق شەشىم قابىلدانادى»، — دەپ تۇيىندەدى پوليسيادا.