الماتى تۇرعىندارى «اتاكەنت» ساياباعىنداعى اعاشتاردىڭ كۇيىنە الاڭداۋشىلىق ءبىلدىرىپ، الەۋمەتتىك جەلىلەردە سارعايىپ بارا جاتقان كوشەتتەردىڭ بەينەجازباسىن جاريالادى. قالا تۇرعىندارى بيلىكتى شارا قولدانۋعا شاقىرادى، دەپ حابارلايدى infohub.kz سايتى.
aitenqyzy دەگەن اتپەن تىركەلگەن قولدانۋشى Threads الەۋمەتتىك جەلىسىندە ساياباق اۋماعىنداعى جاسىل جەلەكتەردىڭ كۇيىپ جاتقانىن كورسەتەتىن كادرلاردى جاريالادى. «ءبىزدىڭ „اتاكەنت“ كۇيىپ جاتىر، قالالىق ساياباعىمىزدىڭ قۋراپ جاتقانىن كورۋ وتە قىنجىلتادى. شارا قولدانىپ، اعاشتارىمىزدىڭ ولۋىنە جول بەرمەۋلەرىڭىزدى سۇرايمىن»، — دەپ جازدى ول.
ماسەلەگە قالانىڭ باسقا دا تۇرعىندارى قوسىلدى. پىكىرلەردە ولار جاز باسىندا اكىمدىك پەن «زەلەنسترويعا» جۇگىنگەندەرىن، ءبىراق ەشقانداي جاۋاپ بولماعانىن ايتادى. «جاز باسىندا اكىمدىككە دە، „زەلەنسترويعا“ دا جازدىم، „قاداعالايمىز“ دەپ جاۋاپ بەردى، ءبىراق ناتيجە قايدا؟»؛ «مەن دە وتكەن جىلدان بەرى „اتاكەنتتىڭ“ جوعارعى جاعىندا نە بولىپ جاتقانىن جازعىم كەلدى. نەگە اعاشتار مەن قاراعايلار سۋارىلمايدى؟»؛ «بالكىم، بۇل ينفەكسيا نەمەسە زيانكەستەر شىعار. وكىنىشكە قاراي، بۇكىل قالادا اعاشتارعا قاتىستى جاعداي ءماز ەمەس»، — دەپ بولىسەدى قالا تۇرعىندارى.
بوستاندىق اۋدانى اكىمدىگى احۋالعا تۇسىنىكتەمە بەردى. وندا ساياباق اۋماعىندا ستاسيونارلىق سۋارۋ جۇيەسى جوق ەكەنىن، سوندىقتان كوشەتتەرگە كۇتىم موتوپومپالاردىڭ كومەگىمەن سۋ جىبەرۋ ادىسىمەن جۇزەگە اسىرىلاتىنىن ءتۇسىندىردى. «جاسىل جەلەكتەرگە ءتيىستى كۇتىمدى قامتاماسىز ەتۋ ماقساتىندا قازىرگى ۋاقىتتا سۋارۋ مەحانيكالاندىرىلعان تاسىلمەن كۇشەيتىلدى. تۇنگى ۋاقىتتا ساياباق اۋماعىن سۋارۋ ءۇشىن قوسىمشا 5 بىرلىك سۋارۋ تەحنيكاسى جۇمىلدىرىلدى. احۋال باقىلاۋدا، سۋارۋ جۇمىستارى كۇشەيتىلگەن رەجيمدە جۇرگىزىلۋدە»، — دەپ سەندىردى اكىمدىكتە.