15 تامىز، بەيسەنبى كۇنى الماتى مەن اتىراۋدا اۋانىڭ لاستانۋىنا ىقپال ەتەتىن قولايسىز مەتەورولوگيالىق جاعدايلار كۇتىلۋدە، ال تۇندە ولارعا وسكەمەن قوسىلادى، دەپ حابارلايدى infohub.kz سايتى.
«قازگيدرومەت» ماماندارىنىڭ تۇسىندىرۋىنشە، قولايسىز مەتەورولوگيالىق جاعدايلار (قمج) — بۇل تىمىق اۋا رايى، ءالسىز جەل، تۇمان جانە ينۆەرسيا سياقتى قىسقا مەرزىمدى مەتەورولوگيالىق فاكتورلاردىڭ جيىنتىعى، ولار اتموسفەرانىڭ جەرگە جاقىن قاباتىندا زياندى زاتتاردىڭ جينالۋىنا اكەلەدى. قمج پايدا بولعان كەزدە ەلدى مەكەندەردە اۋا ساپاسى ناشارلاۋى مۇمكىن. لاستانۋ دەڭگەيى كوبىنەسە جەل، جاۋىن-شاشىن، ىلعالدىلىق پەن تەمپەراتۋرانى قامتيتىن سينوپتيكالىق جاعدايدىڭ بولجامىنا بايلانىستى.
قولايسىز جاعدايلارعا بايلانىستى ماماندار اشىق اۋادا، اسىرەسە اۆتوموبيل جولدارىنىڭ جانە باسقا دا لاستانۋ كوزدەرىنىڭ جانىندا بولۋ ۋاقىتىن قىسقارتۋدى ۇسىنادى. بالالار مەن جۇكتى ايەلدەرگە ۇزاق سەرۋەندەردەن باس تارتقان ءجون. وكپەنىڭ سوزىلمالى اۋرۋلارى، جۇرەك-قان تامىرلارى جانە اللەرگيالىق اۋرۋلارى بار ادامدار كوشەدە جۇرگەندە دارى-دارمەكتەرىن وزدەرىمەن بىرگە الىپ جۇرۋلەرى كەرەك. سونداي-اق اشىق اۋادا فيزيكالىق جۇكتەمەنى شەكتەۋ، ال دەنە شىنىقتىرۋ جانە سپورتپەن جابىق كەشەندەردە اينالىسۋ ۇسىنىلادى.