الماتى تۇرعىندارى قوعامدىق كولىك جۇمىسىنداعى اقاۋلار تۋرالى كوپتەپ حابارلاۋدا. ولاردىڭ ايتۋىنشا، مارشرۋتتارعا ءبىرلى-جارىم اۆتوبۋس شىعىپ، باسىم بولىگى گاز قۇيۋ ستانسيالارىندا تۇر. بۇعان قالاداعى بىرنەشە گاز بەكەتىندەگى تەحنيكالىق اقاۋ سەبەپ بولعان، دەپ حابارلايدى infohub.kz.
29 شىلدە كۇنى تاڭەرتەڭ الەۋمەتتىك جەلى قولدانۋشىلارى جاروكوۆ كوشەسىندە اۆتوبۋستاردىڭ اۆتوموبيل گاز قۇيۋ ستانسياسىنا (اگقس) كەزەككە تۇرىپ، ۇزىن كولوننا قۇرعانىن جازدى. كۋاگەرلەردىڭ ايتۋىنشا، قوعامدىق كولىك ءبىر جولاقتى تۇگەل الىپ قالعان. جاياۋ جۇرگىنشىلەر جولى جوندەلىپ جاتقاندىقتان، جولدىڭ ءبىر بولىگى جابىق، بۇل جاعدايدى ودان ءارى ۋشىقتىردى.
وننان استام اۆتوبۋستان تۇراتىن مۇنداي كولوننالار رايىمبەك داڭعىلىندا دا بايقالدى. قولدانۋشىلار اۆتوبۋستى 30–40 مينۋت كۇتۋگە ءماجبۇر بولعاندارىن ايتادى. كەيبىرەۋلەر مۇنى گاز تاپشىلىعىمەن، ەندى بىرەۋلەر جول جوندەۋ جۇمىستارى مەن كەپتەلىسپەن بايلانىستىرادى.
كەيىن Kazakhstan Bus Community قاۋىمداستىعى اقاۋلاردىڭ سەبەبى الماتىداعى بىرنەشە اۆتوموبيل گاز تولتىرۋ كومپرەسسورلىق ستانسياسىنداعى (اگتكس) تەحنيكالىق ىستەن شىعۋ بولعانىن مالىمدەدى. «قالاداعى كوپتەگەن گاز مارشرۋتتارىندا جىلجىمالى قۇرامنىڭ جوسپارلى شىعارىلىمى ايتارلىقتاي تومەندەدى. جەكەلەگەن باعىتتاردا مارشرۋتقا تورتتەن سەگىزگە دەيىن اۆتوبۋس قالدى. كولىك قوزعالىسىنىڭ ارالىعى ۋاقىتشا ۇلعايتىلدى»، — دەلىنگەن حابارلامادا.
Kazakhstan Bus Community ماماندار اقاۋدى جويۋعا كىرىسىپ، اۆتوبۋستاردىڭ ادەتتەگى كەستەگە ورالاتىنىن قوستى.