31 تامىز بەن 14 قىركۇيەك ارالىعىندا الماتىدا سالىنىپ جاتقان تۇرعىن ءۇي كەشەنىنە ينجەنەرلىك جەلىلەردى تارتۋ جۇمىستارىنا بايلانىستى ءبىر كوشەدە كولىك قوزعالىسى ءىشىنارا شەكتەلەدى، دەپ حابارلايدى infohub.kz سايتى.
قالالىق ەنەرگەتيكا جانە سۋمەن جابدىقتاۋ باسقارماسىنىڭ مالىمەتىنشە، جۇمىستار المالى اۋدانىندا جۇرگىزىلەدى. جەلىلەر سالىنىپ جاتقان «شەۆچەنكو-بايزاقوۆا» تۇرعىن ءۇي كەشەنىنە تارتىلۋدا. وسىعان بايلانىستى بايزاقوۆ كوشەسىنىڭ جامبىلدان شەۆچەنكوعا دەيىنگى بولىگىندە كولىك قوزعالىسى ءىشىنارا شەكتەلەدى. جۇرگىزۋشىلەردەن ۋاقىتشا شەكتەۋلەردى ەسكەرىپ، جول مارشرۋتىن الدىن الا جوسپارلاۋ سۇرالادى.
ۆەدومستۆو جۇمىستار ءۇش ۋچاسكەدە جۇرگىزىلەتىنىن ناقتىلادى. جىلۋ جەلىلەرى جامبىل كوشەسى، 168ا مەكەنجايىنداعى قوسىلۋ نۇكتەسىنەن سالىنىپ جاتقان عيماراتقا دەيىن تارتىلادى. سۋ قۇبىرى جانە سۋ بۇرۋ جەلىلەرى — بايزاقوۆ كوشەسى، 232 مەكەنجايىنداعى قوسىلۋ نۇكتەلەرىنەن نىسانعا دەيىن.
ينجەنەرلىك جەلىلەردى تارتۋ جۇمىستارىن Qazaq Stroy كومپانياسى جۇرگىزەدى. جوبا اياسىندا كارىز جەلىلەرىن مونتاجداۋ جانە كەيىننەن اۋماقتى اباتتاندىرۋ دا قاراستىرىلعان. بارلىق جۇمىستاردى 2026 جىلدىڭ 18 قىركۇيەگىنە دەيىن اياقتاۋ جوسپارلانۋدا.
باسقارما تۇرعىندار مەن جۇرگىزۋشىلەرگە ۋاقىتشا قولايسىزدىقتاردى تۇسىنىستىكپەن قابىلداپ، ءجۇرىپ-تۇرۋدى جوسپارلاۋ كەزىندە شەكتەۋلەردى ەسكەرۋدى جانە جۇمىس جۇرگىزىلىپ جاتقان جەردىڭ ماڭىندا قاۋىپسىزدىك شارالارىن ساقتاۋدى سۇرايدى.